O CHUAC realiza oito transplantes a sete pacientes en pouco máis de 24 horas
É unha nova marca na actividade hospitalaria nun mes de agosto
Encabeza ano tras ano a lista de hospitais con máis actividade de transplantes en toda España. A aparición de tres doadores de órganos desencadeou no CHUAC un operativo sen precedentes nun mes de agosto.
"Xuntáronse moitos transplantes en moi pouco tempo e iso esixe un esforzo organizativo coa dificultade engadidade de que estamos en período estival", explica o coordinador cirúrxico da Área Sanitaria, Carlos Nieto.
Foi necesario mobilizar un cento de profesionais para dar resposta a este reto. Entre eles un equipo que viaxou a Navarra de onde procedía un dos doadores. Finalmente, as intervencións puidéronse desenvolver con éxito para os sete pacientes. Todos eles homes de entre 54 e 73 anos de idade que recibiron dous pulmóns, catro riñóns e dous fígados.
"Puidémolo facer intentando minimizar na actividade ordianaria. Houbo que suspender dous quirófanos que xa reprogramamos", di o coordinador cirúrxico da Área Sanitaria, Carlos Nieto.
Un sistema público que responde grazas á solidariedade de doadores e familias que regalan vida nos momentos máis complicados.
"Hai varias patas para que isto funcione. Unha é o compromiso dos profesionais. Pero sen dúbida o máis importantes son os doadores e as familias", asegura Carlos Nieto.
A Coruña sitúase por riba da media nacional en doazón de órganos. 9 de cada dez familias en disposición de doar responden á chamada da solidariedade.
