Cómpre regar a horta nas horas máis frescas do día para evitar danar as plantas
Tamén convén irrigar ao nivel do chan, para evitar a aparición de fungos nalgunhas hortalizas, e procurar usar sistemas de rego por goteo
Regar a horta ao mediodía é o que nunca se debe facer, e menos aínda cando vai calor. Non só resulta inútil posto que a auga se evapora, senón que ademais pode acabar prexudicando as plantas.
"Porque se despois nos vén o sol, quéimanos a planta. E se nos pasamos co rego, corremos o risco de coller fungos, máis pulgóns...", sinala María González, encargada do invernadoiro da Comercial Falcón.
Tampouco convén regar os cultivos por riba. Na maior parte dos casos, cómpre irrigar ao nivel do chan, co fin de evitar a aparición de fungos.
"Á planta cáelle directamente a auga e fai esas manchiñas que son o fungos", advirte a encargada da tenda lucense.
A tal efecto, existen sistemas de rego que facilitarán este labor. A partir de catro euros, hai dispoñibles pequenos depósitos que se chantan na terra e que hidratan as raíces.
"Temos desde calquera tipo de sistema de goteo e programadores. É simplemente enchufalo, concretar unhas horas e uns minutos e xa nos esqueceriamos do rego", aconsella María González.
A longo prazo, os sistemas de rego acaban por aforrar tempo, gastos e disgustos.
