Complétase a colocación do corazón do centro de protonterapia de Galicia
Este sábado instalouse o acelerador de protóns no búnker do novo edificio no complexo hospitalario de Santiago
Alfonso Rueda destacou que Galicia vai ser a primeira comunidade en ofrecer a protonterapia na sanidade pública
O tratamento de protóns vai permitir mellorar a curación de tumores complexos e cancros infantís
O ciclotrón, o acelerador de protóns, xa está instalado no centro de protonterapia de Galicia. Chegou dende Bélxica para cambiar o futuro do tratamento contra o cáncro. A protonterapia vai ser especialmente importante na curación de tumores complexos e cancros nos nenos.
"Polas características dos protóns van permitir en localizacións complexas, próximas a órganos críticos importantes, alcanzar doses altas, que coa radioterapia convencional non poderiamos, e preservar os tecidos sans con maior seguridade. Localizacións próximas á medula espiñal, ao cerebro, ás vías óticas, ao corazón", explica a oncóloga, Victoria Fernández.
Galicia vai ser a primeira comunidade que ofreza a protonterapia na sanidade pública.
Alfonso Rueda asegura que "cando falamos da sanidade que se ten que ocupar de todo, referímonos tanto á medicina primaria como a medicina de vangarda, como o centro de protonteraipa. Este é o traballo que vale a pena e que a xente espera de nós", conclúe.
O investimento total do centro vai superar os 60 millóns de euros. Agárdase que os primeiros enfermos poidan ser tratados aquí dentro dun ano.
.png)
