Piden once anos de prisión por matar un mozo cun pau en Ortigueira
A Fiscalía acusa o procesado por homicidio e reclama máis de 256.000 euros en indemnizacións
Foi tras unha discusión nunha estrada de Mañón. A vítima sufriu feridas graves e morreu seis días despois da agresión.
Os feitos que se van xulgar estes días na Audiencia Provincial da Coruña remóntanse ao verán de 2020. Segundo mantén a fiscalía, unha discusión entre dous homes nunha estrada da parroquia de Santa María de Mañón acabou cun deles gravemente ferido e morto, seis días despois.
A vítima, un veciño de Ortigueira de 30 anos, circulaba en coche pola estrada que atravesa a zona cando se cruzou co acusado. Tras unha discusión, baixou do vehículo e recibiu un golpe na cabeza, cun pau que había no lugar. O impacto provocoulle múltiples fracturas no cranio, e lesións cerebrais de extrema gravidade. Foi trasladado ao CHUAC, onde permaneceu ingresado ata o seu falecemento o 2 de xullo.
Por estes feitos, a fiscalía pide para o acusado once anos de prisión por homicidio. Tamén reclama indemnizacións para a que era a parella da vítima, coa que mantiña unha relación dende había máis de dez anos, e para os seus pais e a súa irmá. En total máis de 245.000 euros polos danos psicolóxicos e emocionais derivados da súa morte, así como máis de once mil euros para o Sergas polos gastos sanitarios derivados da súa atención.
As acusacións particulares elevan a pena a 25 anos por un delito de asasinato. A defensa pola súa banda pide a absolución alegando que houbo confesión e dilacións indebidas en todo o proceso.
O veredicto queda agora en mans do tribunal do xurado.
