Tráfico intenso no primeiro retorno da operación Semana Santa, que remata este luns
O operativo complétase o Luns de Pascua nas comunidades autónomas onde é festivo: Cataluña, Valenciana, Navarra, País Vasco e A Rioxa
Segundo o balance provisional da DXT, dende que comezou a campaña faleceron polo menos 22 persoas na rede viaria española
Este domingo comezou oficialmente o primeiro retorno da operación Semana Santa 2025. A partir de media mañá, comezou a rexistrarse unha alta densidade de tráfico en zonas turísticas. Xa pola tarde, foise trasladando ás principais vías de entrada dos grandes núcleos urbanos.
As maiores complicacións comezaron ás 11:00 horas e prolongaranse ata a medianoite. Durante toda a xornada, Tráfico puxo en marcha medidas especiais para facilitar o regreso.
Segundo o balance provisional da Dirección Xeral de Tráfico, dende que comezou a campaña faleceron polo menos 22 persoas na rede viaria española. Houbo 21 accidentes mortais, seis menos dos rexistrados no mesmo período do ano pasado.
Luns festivo
O retorno complétase o Luns de Pascua nas comunidades autónomas onde é festivo: Cataluña, Comunidade Valenciana, Navarra, País Vasco e A Rioxa. Agárdanse retencións nas vías principais destas rexións e nos accesos desde provincias limítrofes.
A franxa crítica volverá ser de 11:00 a 24:00 horas. Ademais, no resto do país tamén se producirán desprazamentos de retorno, impulsados polo inminente reinicio das actividades escolares e universitarias.
A operación especial Semana Santa 2025 concluirá oficialmente ás 24:00 horas do luns 21 de abril.
