Comeza o Festival Internacional de Big Bands de Redondela
O trompetista David Pastor é o músico convidado
Con propostas didácticas e musicais, hoxe comeza a terceira edición do festival de Big Bands de Redondela.
A cita ten como convidado o trompetista David Pastor, membro da banda de Juan Perro e que compartiu escenario con artistas como Celia Cruz, Martirio ou Miguel Poveda. Pastor dirixe as clases maxistrais destinadas aos musicos e tamén actuará ante o público coa Xingros Big Band, a formación residente do conservatorio de Redondela.
No mundo do jazz, a big band é a orquestra por excelencia e, polo número de integrantes, a súa sonoridade é poderosa. Ademais, para os músicos é unha experiencia persoal inesquecible.
Pastor pisa os palcos de todo o mundo cos grandes da música. Neste terceiro Festival de Big Bands de Redondela comparte cos asistentes os segredos do seu instrumento, a trompeta, e as claves da improvisación.
O público ten dúas ocasións para ver en directo o trompetista convidado coa Xingros Big Band do Conservatorio de Redondela este venres no Multiusos da Xunqueira e o sábado no auditorio de Chapela. As actividades do festival regresarán o vindeiro mes de xullo.
