Comeza o desmonte do van da A-6 que quedou en medio dos dous derrubados

O Ministerio de Transportes, Mobilidade e Axenda Urbana (Mitma) comezará este mércores os traballos de desmonte do van 2 do viaduto do Castro da autovía do Noroeste A-6 (punto quilométrico 430, sentido A Coruña), tras o colapso dos dous vans adxacentes, o 1 e o 3, o pasado mes de xuño, segundo informa o Ministerio nun comunicado.

Unha vez realizado o desmonte do van 2 mediante medios mecánicos operados de forma remota, procederase a desmontar os seus piares e a retirar os restos dos tres vans. Os traballos, asegura o Mitma, vanse desenvolver sempre dando prioridade a máxima seguridade dos operarios.

No esquema da obra que presenta o Ministerio explícase que se vai situar un gran guindastre sobre o viaduto da A-6 en sentido Madrid e que se empregará para alzar os restos dese van que quedou en medio dos dous derrubados.