Comeza a campaña da centola no Grove
O tope de capturas son 35 quilos por embarcación e outros 35 por cada tripulante
Medio cento de embarcacións saíron do porto do Grove este domingo para largar os aparellos na ría. Este luns volveron ao mar para levantar os miños e recoller as capturas. Algunhas dignas de exhibir, como facían os tripulantes do Mar e Mar.
As condicións meteorolóxicas son óptimas hoxe. O mar revolto fai que o marisco se mova e entre nos aparellos como nos explica Martín Vidal, un dos mariñeiros mecos que anda á centola.
O tope de capturas son 35 quilos por embarcación e outros 35 por cada tripulante. Nesta primeira xornada algúns quéixanse de non alcanzalos, pero confían en que vaia a mellor a medida que vaian comprobando os caladoiros.
O que non ten discusión é a calidade do produto. Todos coinciden en que a centola da ria de Arousa é excelente.
Ás 5 da tarde comezará a primeira poxa na lonxa do Grove. O prezo mínimo pactado pola confraría é de 13 euros o quilo. Confían en igualar ou superar os 27 aos que chegou o ano pasado tal e como explica Antonio Otero, vicepatrón primeiro da Confraría San Martiño do Grove.
