Coalición Canaria, igual que o PNV, votará non á prórroga automática dos alugueiros

A única deputada de Coalición Canaria no Congreso, Cristina Valido, votará este venres a favor da convalidación de decreto lei que fixa límites ao desafiuzamento de persoas en situación vulnerable, entre outras medidas, mentres que rexeitará o referido á renovación automática dos alugueiros.

O secretario de Organización de CC, David Toledo, deu a coñecer o sentido da votación dos dous decretos sobre vivenda tras a reunión que mantiveron os secretarios insulares da súa formación.

Explicou que aínda que en principio ambos os decretos ían ser rexeitados porque non tratan a singularidade insular, o Goberno central aceptou as condicións que lle impuxo de CC como que o decreto sexa tramitado como proxecto de lei "para que non sexa un cheque en branco e se poida emendar".

Sobre o segundo decreto, Toledo sinalou que está totalmente en contra porque desprotexe ao propietario e ao inquilino, é "un auténtico desastre", provocará inseguridade xurídica e fará que se retiren do mercado miles de pisos.

A formación canaria coincide co PNV que tamén xa anunciou que votará en contra dese segundo decreto, condenado xa o fracaso.

O primeiro dos decretos, o das medidas xerais de vivenda, parece que ten algunha posibilidade de prosperar.  Tras o si de Podemos, o resultado final está en mans de Junts. Se os cataláns votan en contra, ese decreto principal decaerá. Pero pode saír adiante se se absteñen, despois de que Coalición Canaria confirmara o apoio.

A votación será este venres, nun pleno extraordinario pola mañá.