Putin advirte de que empregará "todo o seu arsenal" en caso de ataque a calquera rexión rusa

O presidente ruso, Vladímir Putin, advertiu este xoves de que o seu país empregará "todo o seu arsenal" en caso de ataque contra o enclave báltico de Kaliningrado ou calquera outra rexión rusa.

"Se chegamos a un ataque directo contra a Federación Rusa, e refírome a Kaliningrado, pero tamén pode pasar con calquera outro territorio, por suposto, na axenda figurará inevitable e inmediatamente a cuestión do emprego por parte de Rusia de todo o armamento ao seu alcance. Iso é inevitable", dixo no club de debate Valdái.

O xefe do Kremlin subliñou que as declaracións feitas nos últimos dous días polos diplomáticos rusos son absolutamente acertadas, aínda que matizou que ninguén mencionou "as armas nucleares".

"Nós non asustamos a ninguén (...), esas non son intimidacións, senón a resposta aos intentos de amedrentarnos", sinalou.

Entre eses intentos citou os preparativos europeos para unha guerra contra Rusia a finais desta década, as constantes manobras da OTAN no Báltico e as interceptacións de barcos rusos, actos que cualificou de "escalada".

"Nós non ameazamos a ninguén, non temos intención de atacar nin en 2029, nin en 2030, nin en 2050. Pero se nos atopamos cunha agresión, temos que responder", afirmou.

Asegurou que a Alianza Atlántica ten un potencial económico e de poboación moito maior ca a Federación Rusa, pero lembrou que Moscova conta con armamento estratéxico, en clara alusión ao armamento hipersónico, "que ninguén posúe".

"Debemos aproveitar a nosa vantaxe competitiva. (...) Decidiremos nós cal será", aseverou.

A OTAN acusou Rusia de recorrer á "retórica militar" despois de que Moscova mostrase a vontade de empregar armas nucleares en caso de "bloqueo aéreo e marítimo de Kaliningrado", algo que Moscova considera un 'casus belli', é dicir, motivo de guerra.