Claudio agarda unha "guinda" ao mercado dun perfil semellante a Brais Méndez
O técnico recoñeceu que lle gustaría que chegara "un enganche"
Preguntado directamente polo mosense: "Brais Méndez gústame ... Indicios sempre hai, é unha esperanza"
Falouse moito do mercado e pouco do partido contra o Vilarreal na rolda de prensa previa ao encontro. O luns ás doce da noite remata o período de fichaxes e Claudio recoñeceu que lle falta "unha guinda" para pechar o plantel.
A primeira premisa para traer un xogador é liberar unha ficha porque o Celta ten todos os ocos cubertos. Cervi e Aidoo son xogadores que non contan para o adestrador. Outros como Miguel Román ou Damián teñen mercado para marcharen cedidos aínda que o adestrador asegurou que "non entra nos meus plans que saian cedidos".
O perfil de posición que lle gustaría reforzar é o de "enganche, un xogador que poida actuar entre liñas" semellante ao papel que interpretaba Fer López ou un perfil como Brais Méndez. Claudio foi preguntado directamente pola posibilidade de incorporar ao mosense e a súa resposta foi breve: "Brais Méndez gústame".
"Indicios sempre hai, é unha esperanza que poida vir ese xogador" asegurou Giráldez. "Non dou por pechado nada ata o luns pero estou tranquilo" comentou sobre un mercado que quere que acabe "canto antes" para que os xogadores poidan centrarse no importante, o que aconteza no terreo de xogo.
