Cerdán pide ao Constitucional que anule a prisión provisional imposta polo Supremo

O exsecretario de Organización do PSOE, Santos Cerdán, presentou un recurso de amparo ante o Tribunal Constitucional para que anule a prisión provisional decretada polo xuíz do caso Koldo no Tribunal Supremo o pasado 30 de xuño e ratificada por ese tribunal o 23 de xullo.

A defensa de Cerdán sostén que o Supremo vulnerou o seu dereito á liberdade e á presunción de inocencia ao acordar o seu ingreso en prisión sen xustificar "debidamente a concorrencia de ningún risco de alteración ou destrución de probas", fundamento central da medida adoptada.

Segundo o recurso, "establecer como único motivo para presupoñer un risco de alteración ou destrución de probas (...) un suposto papel directivo por parte do señor Cerdán inferido unicamente por unha análise subxectiva en relación a uns audios que a día de hoxe descoñecemos tanto a súa veracidade como o seu contido (...) resulta totalmente insuficiente e non cumpre cos estándares esixidos" pola doutrina do Tribunal Constitucional e do Tribunal Europeo de Dereitos Humanos.