Carl Starfelt ten unha hernia discal na zona lumbar

Segundo os servizos médicos do club, Carl presentaba un cadro de lumbalxia leve que se intensificou durante a súa participación coa súa selección de Suecia no partido disputado o pasado 31 de marzo. Tras a exploración clínica, realizóuselle unha resonancia magnética da columna lumbar, que confirmou a presenza dunha hernia discal L5-S1.

Desde entón, o xogador seguiu un tratamento conservador que incluíu medicación, fisioterapia, técnicas de distracción vertebral e varias infiltracións epidurais, sendo a máis recente aplicada esta mesma semana.

Aínda que a evolución foi favorable e experimentou unha melloría notable, Starfelt continúa con limitacións para a actividade no campo. Por iso, solicitouse unha valoración externa por parte do neurocirurxián Dr. Pedro Mata, especialista de referencia en cirurxía de columna en Madrid.

Actualmente, estase á espera de avaliar a resposta á última infiltración epidural, mentres se manteñen as medidas de tratamento conservador. Nun prazo estimado de dúas a tres semanas valorarase a súa evolución e, en función da mesma, considerarase a posible indicación de tratamento cirúrxico.