Os cribados de cancro de colon mudan a metodoloxía para aumentar a participación
En lugar dunha invitación, os usuarios recibirán na súa casa directamente un kit para realizar o test
Desde que comezaron, en 2013, estes programas detectaron máis de 2.000 casos de pacientes con pólipos malignos
O Sergas xa comezou a enviar ao domicilio dalgúns usuarios o kit co test para participar no cribado do cancro colorrectal. Calculan que así poderán incrementar a participación en máis de 12.000 persoas e que isto podería contribuír a detectar de xeito precoz 50 cancros ao ano máis.
Grazas a estes programas de detección precoz, dous de cada tres casos de cancro colorrectal son detectados en estadios moi iniciais, o que resulta moi importante para a eficacia dos tratamentos.
"O obxectivo principal do cribado de calquera cancro é adiantarse, detectalo nos estadios máis precoces posibles para que a evolución sexa boa e teña unha elevada supervivencia", explica Carmen Durán Parrondo, directora xeral de Saúde Pública.
Ata agora aos posibles participantes enviábaselles unha invitación a participar, pero agora recibirán nos seus domicilios, directamente, o kit para a toma de mostras do test que entregarán despois no centro de saúde.
"Un dos principais problemas que hai a nivel mundial cos cribados de cancro colorrectal é que a participación non é tan alta como por exemplo, no cribado de cancro de mama. O que facemos en Galicia é probar novas metodoloxías para incrementar esta porcentaxe de participación", dixo Durán Parrondo.
Os resultados da pilotaxe, que se presentaron este martes, demostran que co envío directo do kit a participación aumenta 6 puntos.
Durante a presentación, os responsables do Sergas explicaron tamén que se vai comezar a empregar intelixencia artificial para o diagnóstico e que as ferramentas de convocatoria dixital vanse estender aos cribados de cancro de colo do útero.
