Cae unha rede que introducía haxix pola costa de Almería en narcolanchas
No marco da operación, denominada Eagle, as forzas de seguridade detiveron dezaoito persoas
Desmantelada unha organización criminal dedicada a introducir haxix en narcolanchas polas costas de Almería. No marco da operación, denominada Eagle, detiveron dezaoito persoas.
Esta operación, en que se investigaron delitos de pertenza a organización criminal, tráfico de drogas, tenza ilícita de armas e contrabando, arrincou en outubro de 2022.
Entón, a Garda Civil interceptou unha descarga de máis de 1.000 quilos de haxix na praia coñecida como o Perdigal, pertencente á barriada almeriense de Costacabana.
En marzo do ano pasado tivo lugar un segundo desembarco na zona da Universidade de Almería. Daquela, as forzas de seguridade detiveron sete persoas e comisaron 1.700 quilos de haxix.
A Garda Civil informou este sábado nun comunicado que levou a cabo cinco rexistros e inspeccións nas localidades de Roquetas de Mar, Vícar e Almería.
En total, comisou 27.000 euros en efectivo, tres quilos de mostra de haxix, unha arma curta, un inhibidor de ondas de frecuencia, varios teléfonos móbiles e satelitais ademais de numerosa documentación.
Do norte de África a Almería
Segundo o instituto armado, a organización encargábase de contactar cos membros que se atopaban no norte de África que transportaban en embarcacións a droga ata a costa de Almería.
Xa en España, agardaban grupos de dez persoas para introducir os fardos en vehículos de carga que posteriormente transportaban ás garderías para a súa distribución.
A investigación, dirixida polo Xulgado de Instrución número 6 de Almería, foi desenvolta polo Equipo de Delincuencia Organizada e Antidroga (EDOA) da Unidade Orgánica de Policía Xudicial de Almería, co apoio da Unidade Central Operativa (UCO).
Unha das narcolanchas utilizadas no transporte da droga
