A Casa Branca insiste en que todos os países da OTAN deben destinar o 5 % do PIB a defensa

A Casa Branca reiterou este xoves que todos os países membros da OTAN, incluída España, deben achegar o 5 % do seu PIB ao gasto en defensa. A petición chega despois de que o presidente do Goberno español, Pedro Sánchez, comunicara ao secretario xeral da Alianza Atlántica, Mark Rutte, a negativa de España a asumir ese compromiso.

"Non vin os comentarios de España. Asegurareime de que o presidente os coñeza, e podo asegurar que quere que todos os países europeos paguen a súa parte xusta e alcancen ese limiar do 5 %", afirmou a secretaria de prensa da Casa Branca, Karoline Leavitt, en rolda de prensa.

Leavitt defendeu que esta porcentaxe é "xusta", tendo en conta que os contribuíntes estadounidenses achegaron "miles de millóns de dólares" para apoiar a defensa mutua e os intereses comúns dos aliados. "Trump deixou moi claras as súas prioridades para os aliados europeos, incluída España", engadiu.

España rexeita a proposta e reclama flexibilidade

Pedro Sánchez cualificou de "irracional e contraproducente" para España a proposta de elevar o gasto en defensa ata o 5 % do PIB e defendeu que esa meta é incompatible co mantemento do estado do benestar e coa súa "visión do mundo".

Nesa liña, na carta remitida a Mark Rutte, o presidente propón introducir unha fórmula máis "flexible" na declaración que se aprobará no cume da OTAN da próxima semana na Haia. Suxire que o obxectivo do 5 % sexa opcional ou, en última instancia, que se exclúa a España da súa aplicación.

Na misiva, Sánchez reivindica o dereito de cada goberno a decidir se realiza ou non certos "sacrificios", como subir impostos á clase media ou recortar servizos públicos e prestacións sociais, para cumprir os obxectivos militares.