Un incendio diante dun taller de Tui calcina sete coches
O incendio ocorreu de madrugada e non houbo feridos
Un incendio diante dun taller afectou de madrugada a sete vehículos en Tui (Pontevedra).
O lume detectouse contra as 04:30 horas, momento en que un particular informou a Emerxencias de que un coche ardía diante dun taller situado no lugar de Torre, en Guillarei.
Pouco despois, outras persoas, incluída a dona do taller, confirmaron que non había feridos e que todos os vehículos afectados estaban no exterior das instalacións.
Pasadas as 05:00 horas, os equipos de intervención deron por controlada a situación. O incendio destruíu por completo seis coches e afectou parcialmente a outro.
No interior do taller arderon papeis e algún reposto situado preto da entrada, e tamén resultou danada a fachada. No operativo participaron os Bombeiros do Porriño, o GES e o Servizo de Emerxencias de Mos, a Garda Civil, os voluntarios de Protección Civil de Tui e persoal do distrito forestal da zona.
