Burela, epicentro do sector pesqueiro na XX edición de Expomar
Presentan o último en innovación 350 marcas e 50 expositores
O conselleiro do Mar asistiu á xornada inaugural
Catro días, do 7 ao 10 de maio, para analizar os retos e os problemas do sector
Vinte anos da Expomar de Burela e vinte edicións innovando para atraer cada vez máis participantes e máis visitas. 30.000 tiveron o ano pasado, o que subliña a súa importancia como destaca o conselleiro do Mar, Alfonso Villares.
"Porque se presentan avances, iniciativas, proxectos, ideas, todo canto se está facendo e todo canto hai que facer no sector", explicou.
Ás 350 marcas e 50 expositores engaden desta volta un novo espazo networking, degustacións e demostracións en vivo como o despezamento dun peixe espada de máis de cen quilos como explica Carmela López, alcaldesa de Burela e presidenta de Expomar.
"Para que sexa tamén un atractivo para todas as persoas da bisbarra, da provincia. E o sábado vai haber un ronqueo", afirmou.
Cinco mil metros cadrados para presentar o último en innovación e tecnoloxía da industria pesqueira, xerar colaboracións e compartir ideas entre empresas, administración e persoas do sector.
Nos vindeiros tres días, as xornadas técnicas e o encontro empresarial analizarán os retos e os problemas actuais do sector.
