Boa parte de Galicia entra nas próximas xornadas en risco extremo de incendio forestal

Nas próximas xornadas e coa suba de temperaturas prevista, boa parte de Galicia entrará en risco extremo de incendio forestal. A situación empeora cara a finais da semana. Para vixiar o monte e disuadir os incendiarios, o Exército colabora coa Xunta na denominada operación Centinela Galego. Unha despregadura que hoxe quixo coñecer a ministra de Defensa.

Margarita Robles visitou a mediodía a sede da Brilat en Figueirido, á que pertencen 25 das 30 patrullas despregadas en Galicia pola operación Centinela, de loita contra os incendios forestais.

"Estas ondas de calor que están vindo son moi perigosas e por tanto hai que concienciar á cidadanía. E hai que dicir tamén que este traballo da Xunta co Ministerio de Defensa, en concreto coa Brilat e coa Infantería de Marina, está dando moi bos resultados", declarou a ministra.

En total a operación Centinela Gallego ten 98 militares e 30 vehículos despregados sobre o territorio as 24 horas do día e os sete días da semana, desde o pasado 15 de agosto e como mínimo ata o 30 de setembro, xa que esta colaboración podería ampliarse se o solicita a Xunta.

Trátase dun convenio que Defensa e a Administración Autonómica manteñen desde 2008 e que este ano se amplía coa integración dun novo distrito Forestal, que incorpora seis municipios máis. Serían en total 39 en oito distritos. Un dos que entran é Folgoso do Courel que o ano pasado sufriu un dos incendios con maior impacto ecolóxico do verán pasado en Galicia.

A Ministra supervisou hoxe a entrega do novo material, entre outros unha ambulancia e 45 vehículos URO, fabricados en Santiago, e que estarán a disposición da operación antes de finais de setembro.