Besteiro apela á "unidade" en Lugo para lograr "impulso político" cara ás municipais

O secretario xeral do PSdeG, José Ramón Gómez Besteiro, apelou este sábado á "unidade total" do partido na provincia de Lugo para lograr un "impulso político" dos proxectos municipais na segunda metade deste mandato e para as próximas eleccións locais.

Besteiro interveu esta mañá no comité provincial do partido, o primeiro desde un proceso de primarias no que José Tomé revalidou o seu cargo á fronte dos socialistas lucenses nunha apertada votación fronte ao alcalde de Paradela, Iván Castro.

"Da unidade nacen os proxectos fortes e crecen os proxectos que perduran", sostivo Besteiro, que contrapuxo o traballo do seu partido en Lugo á xestión do PP. 

Chegou a dicir que os populares empregan Lugo como "un decorado electoral" que logo abandonan e declarou que a provincia sofre "décadas de abandono" que se materializan na falta de vivenda pública, retrocesos nos servizos sanitarios e carencias en atención á dependencia ou nas políticas forestais e industriais. 

Como mostra diso, referiuse ao "proxecto errado de Altri" para instalar unha pasteira en Palas de Rei, que "non conta con garantías nin axudas" e ademais "carece da conexión eléctrica necesaria" para ser viable.

"Non é bo nin para esta provincia nin para a economía do país", resolveu Besteiro.