Besteiro agradece o apoio recibido e asegura que se abre unha nova etapa "con ilusión e compromiso"

O candidato do PSdeG-PSOE á presidencia da Xunta, José Ramón Gómez Besteiro, agradeceu este mércores o apoio recibido e asegurou que se abre unha nova etapa "con ilusión e compromiso". "Quero darvos as grazas polas mostras de apoio que estou a recibir. Son un estímulo para min e vou devolvervos esa confianza. Unha nova etapa que abro con moita ilusión e compromiso", sostén nunha mensaxe publicada non seu perfil da rede social X.

Quero darvos as grazas polas mostras de apoio que estou recibindo. Son un estímulo para min e vou devolvervos esa confianza.

Unha nova etapa que abro con moita ilusión e compromiso. pic.twitter.com/rkAD4WpE2d

— Gómez Besteiro (@jrgomezbesteiro) February 21, 2024

O político, que encabezou a lista ao Parlamento de Galicia pola provincia de Lugo, é tamén deputado no Congreso por esta circunscrición e estes días atópase en Madrid pola celebración do pleno no Congreso. Ademais, alí mantén reunións de traballo en clave galega.

Besteiro confirmou o pasado domingo, despois de coñecerse os resultados dos comicios, que polo momento seguirá coa súa acta no Congreso, á que, en todo caso, renunciará antes do 18 de marzo, data en que se constitúe ou novo Parlamento de Galicia.

Non participará na reunión da executiva do PSdeG

O político lucense non participará este mércores na reunión da executiva do PSdeG-PSOE, un órgano do que non forma parte, en que se prevé que a dirección do partido en Galicia analice os resultados das autonómicas, en que os socialistas galegos só conseguiron nove escanos, cinco menos que nos comicios do 2020.

O secretario xeral do PSdeG-PSOE, Valentín González Formoso, dará conta aos medios dos asuntos tratados nesa reunión extraordinaria da Comisión Executiva Nacional Galega.