Bayrou presenta a súa dimisión e Macron prepara o nomeamento dun novo primeiro ministro
O presidente francés descarta eleccións anticipadas e manexa nomes como Sébastien Lecornu ou Olivier Faure
A crise política dispara a prima de risco da débeda francesa por riba da italiana por primeira vez en dúas décadas
Francois Bayrou na súa comparecencia este luns ante a Asemblea Nacional. REUTERS/Benoit Tessier
O primeiro ministro francés, François Bayrou, presentou este martes a súa dimisión ao presidente.
Emmanuel Macron xa anunciou que designará un substituto nos próximos días e descartou a convocatoria de eleccións, como lle reclama boa parte da oposición.
Bayrou permaneceu case hora e media no Elisio antes de comunicar oficialmente a súa saída.
O veterano político centrista abandona o cargo tras perder de forma contundente (364 votos contra 194) a moción de confianza que el mesmo impulsara para obter apoio ao seu diagnóstico sobre as finanzas públicas e ao plan de recorte do déficit en 44.000 millóns de euros. Permanecerá en funcións ata o nomeamento dun novo executivo, aínda que algúns medios apuntan a que a substitución podería ser inmediata.
Unha remuda clave en plena crise
A saída de Bayrou deixa a Macron ante a tarefa de nomear o seu quinto primeiro ministro do segundo mandato.
Entre os nomes que soan como sucesores están o ministro de Defensa, Sébastien Lecornu, ou mesmo figuras da esquerda, como o primeiro secretario do Partido Socialista, Olivier Faure, que se ofreceu para o cargo.
O Elisio prevé que o novo xefe de goberno negocie un programa mínimo e, en particular, o proxecto de orzamentos para 2026.
A crise política tivo un reflexo inmediato nos mercados: por primeira vez en máis de vinte anos a prima de risco francesa superou a italiana, situándose en 82 puntos básicos fronte a 81,8.
Oito mocións de censura en nove meses
En só nove meses no cargo, Bayrou afrontou oito mocións de censura, reflexo da fragmentación da Asemblea Nacional e do uso reiterado do artigo 49.3 da Constitución, que permite aprobar leis sen votación a cambio de exporse a unha moción de censura. A diferenza doutros casos, Bayrou decidiu someterse ao voto parlamentario sen estar obrigado, o que precipitou a súa caída.
Toda a oposición votou en contra, desde a esquerda ata a extrema dereita, incluíndo parte dos deputados conservadores dos Republicanos (LR), socios clave do seu executivo.
Marine Le Pen (RN) e Jean-Luc Mélenchon (LFI) culpan directamente a Macron da crise e esixen eleccións anticipadas.
LFI mesmo presentou este martes unha moción de destitución do presidente, sen opcións de prosperar.
Chamamento a evitar un baleiro de poder
Dentro do goberno saínte, o ministro do Interior e presidente dos Republicanos, Bruno Retailleau, reclamou a “urxente necesidade” de nomear un novo primeiro ministro para evitar un “baleiro de poder” en vésperas das protestas convocadas os días 10 e 18.
Advertiu tamén dunha posible rebaixa da cualificación da débeda francesa o próximo día 12 e dun “setembro propicio para todo tipo de excesos”.
