Axentes da Policía Nacional sálvanlle a vida a unha muller que se desmaiou na rúa en Vigo

A rápida intervención de dous axentes da Policía Nacional da Comisaría de Vigo permitiu salvar a vida a unha muller que, o pasado 11 de agosto, sufriu un desmaio cando cruzaba unha rúa na cidade, e que a punto estivo de entrar en parada cardiorrespiratoria.

Os feitos ocorreron cando unha dotación policial circulaba pola rúa Venezuela e os axentes decatáronse de que alguén lles pedía axuda desde a beirarrúa. Ao achegarse comprobaron que había unha muller tendida no chan, colocada por unha testemuña en posición de seguridade.

Os policías comezaron rapidamente os primeiros auxilios, tras comprobar as constantes vitais, e pouco despois presentouse unha patrulla da Policía Local. Aproveitando que unha ambulancia pasaba pola zona, saíron ao seu encontro para poñelos sobre aviso; deste xeito, ao pouco tempo os sanitarios xa se fixeron cargo da situación.

A muller foi trasladada ao hospital e o persoal sanitario informouna da importancia da rápida actuación dos policías, clave para que non entrase en parada cardiorrespiratoria. Cando recibiu a alta quixo agradecer aos funcionarios o seu labor: "Moitísimas grazas, salvástesme a vida; sodes os meus anxos da garda".

A vítima asegurou que, a pesar da situación e de que se atopaba semiinconsciente, lembraba como un dos axentes lle daba a man e lle aseguraba que non estaba soa.