Abordan nas Canarias un barco con 4.000 quilos de cocaína que se dirixía a Vigo
A Policía Nacional detivo os nove tripulantes do mercante que levaba a droga agochada nas adegas
Con bandeira de Tanzania, partira do porto panameño de Cristóbal e foi interceptado a 600 millas das illas
O Grupo Especial de Operacións da Policía Nacional abordou a 600 millas das illas Canarias un mercante con 4.000 quilos de cocaína nas súas adegas e que tiña como destino final o porto de Vigo.
Segundo informa nun comunicado, a operación, levada a cabo na noite do pasado mércores, rematou coa detención dos nove membros da tripulación do barco, con bandeira de Tanzania, que partira do porto panameño de Cristóbal.
Trátase dunha das grandes operacións dos últimos anos contra o tráfico de drogas por parte das forzas de seguridade do Estado, que o pasado novembro se incautou de 13.000 quilos de cocaína no porto de Alxeciras.
Nos últimos meses, os distintos corpos policiais comisaron 1.700 quilos de cocaína no porto de Valencia, nunha macrooperación concluída este mesmo outubro, e 3.600 quilos desa mesma droga en Galicia o pasado setembro.
A unidade de elite, baixo a dirección da Fiscalía Especial Antidroga da Audiencia Nacional e co apoio da Armada Española, coordinou o operativo para localizar a embarcación en base ás informacións recibidas pola Administración de Control de Droga (DEA) norteamericana.
O pasado 8 de outubro, deran conta das actividades dunha organización criminal internacional que pretendía levar a cabo o transporte dunha gran cantidade de cocaína a través do océano Atlántico.
Coa alerta recibida, o rumbo facilitado e o modus operandi, as forzas de seguridade deseñaron un operativo para evitar que a droga puidese chegar ata as costas españolas.
Abordaxe do mercante
Sobre as 21:30 horas do 22 de outubro, co apoio das Forzas Armadas españolas, estableceuse un dispositivo de abordaxe, que tivo lugar a 600 millas das illas Canarias.
Unha vez a bordo, detiveron os nove membros da tripulación e, nunha primeira requisa de seguridade, localizaron estruturas e construcións alleas a este tipo de buques, destinadas a almacenar a cocaína.
O buque é o Little Girls, de 54 metros de eslora, 12 de manga e catro e medio de puntal. Construído no 1975, segundo a Policía, buscaba alcanzar o porto de Vigo.
A droga descargouse no porto de Arinaga en Gran Canaria. Tras a pesada en terra, dos 6.500 quilos estimados nun primeiro momento pasouse aos 4.000 realmente aprehendidos.
