As unidades móbiles do exército xa vacinaron 60.000 persoas contra a covid en España

Parte da vintena de profesionais cos que Defensa reforza os puntos de vacinación do Sergas prestan servizo no edificio administrativo da Xunta en Pontevedra. Despois de coñecelos, a ministra Robles recordou a alta mortalidade nas UCI dos hospitais militares de persoas non vacinadas.

Segundo os últimos datos do Ministerio de Defensa, as unidades móbiles militares xa administraron a vacina da covid a 60.000 persoas en toda España desde que o exército sumou os seus dispositivos de apoio a esta campaña.

Horas antes, a titular de Defensa realizou unha visita á base pontevedresa da Brilat, que organizou unha exposición cos medios cos que conta para apoiar á sociedade nunha situación de crise. Tamén coñeceu a sala da Unidade de Vixilancia Epidemiolóxica, onde 80 rastrexadores en dúas quendas realizan acotío unhas 12.000 chamadas a contactos estreitos de positivos.