As sete cidades galegas manterían os alcaldes actuais de se celebraren eleccións

As sete cidades galegas, Vigo, A Coruña, Lugo, Santiago de Compostela, Pontevedra, Ourense e Ferrol, continuarían cos seus alcaldes actuais de se celebraren agora as eleccións municipais, segundo a enquisa elaborada por Sondaxe e publicada este domingo por La Voz de Galicia.

Nos próximos comicios municipais, que se celebrarán en maio de 2027, os socialistas revalidarían mandato en Lugo, A Coruña e Vigo. 

Abel Caballero en Vigo

Na cidade olívica o PSOE obtería un 58,7 % dos votos, o que lle concedería 18 edís -uno menos ca no 2023-. Con todo, a maioría absoluta do alcalde, Abel Caballero, non se vería afectada.

Pola súa banda, o PP manteríase como segunda forza política e o BNG tería catro concelleiros, fronte aos tres actuais.

Inés Rey na Coruña

Na Coruña, o PSOE perdería un concelleiro que cedería ao BNG, cunha suba de 3,3 puntos en estimación de voto con respecto aos anteriores comicios. Nese contexto, os socialistas, -que gobernan en minoría- para manter o bastón de mando necesitarían os nacionalistas.

Pola súa banda, os populares medrarían en estimación de voto e situaríase no 39,7 %, pero manterían os seus 12 concelleiros.

Goretti Sanmartín en Santiago

En Santiago, o BNG sobe en intención de voto e obtería un concelleiro máis -pasaría de seis a sete-, que arrebataría ao PSOE. É a cidade onde máis baixan os socialistas, 3,8 puntos, un escenario marcado pola crise derivada da expulsión de catro concelleiros.

Na capital galega, o BNG sería a forza que máis medra e o PP, liderado por Borja Verea, aínda que sobe en intención de voto, mantería os mesmos concelleiros (11).

Miguel Fernández Méndez en Lugo

En Lugo, o actual bipartito PSOE-BNG podería seguir gobernando. Os socialistas perderían un concelleiro que recollerían os nacionalistas que soben 3,2 puntos con respecto aos anteriores comicios, sendo o partido cun maior aumento.

Pola súa banda, os populares só soben unha décima en estimación de voto e manterían os seus 12 concelleiros.

Fernández Lores en Pontevedra

En Pontevedra, a situación manteríase igual que nas municipais de 2023. O actual alcalde, Miguel Anxo Fernández Lores, que xa anunciou que encabezará as listas do BNG, repetiría o mesmo resultado -9 concelleiros e subiría un 1,3 en intención de voto-.

Pola súa banda, os socialistas manterían os seus cinco edís e os populares serían o partido que máis sobe en apoios (2,1 puntos con respecto a 2023), pero tería os mesmos edís (11).

Rey Varela en Ferrol

Polo que respecta a Ferrol, os populares, con José Manuel Rey Varela á fronte, manterían a súa maioría absoluta, cunha suba de 2,3 puntos en intención de voto.

Todo iso, nun contexto no que o PSOE gañaría un concelleiro, pasando de sete a oito, que arrebataría a Ferrol en Común (que quedaría cun edil) e o BNG seguiría cos seus tres concelleiros.

Jácome en Ourense

En Ourense, Democracia Ourensá, o partido do actual alcalde, Gonzalo Pérez Jácome, sería o máis votado. Mantería os seus 10 concelleiros pero baixaría en estimación de voto -pasando do 33,7 %, ao 32,2 %-.

Na cidade das Burgas, a situación sería moi similar á dos últimos comicios municipais, cun único cambio: os socialistas perderían un concelleiro que gañaría o BNG.