As probas de carga para instalar o guindastre sobre a ponte de Cerdedo serán este martes
As probas de carga para instalar o guindastre sobre a ponte de Cerdedo serán este martes
O alto caudal do río Lérez por mor da intensa chuvia destes días podería atrasar esta tarefa
A recuperación do autobús e o tacógrafo achegará máis datos sobre as causas do accidente
O mal tempo influíu no sinistro, pero non se desbotan outros factores
Unha vez finalizadas as tarefas de rescate das vítimas do accidente do autobús en Cercedo-Cotobade, os traballos na zona céntranse na recuperación do vehículo do río, para o que será necesario a instalación dun guindastre.
O primeiro paso será a medición da capacidade de resistencia da ponte para o que van realizar unhas probas de carga da infraestrutura este martes. Esta información servirá de base aos expertos para elexir onde ubicar o guindastre encargado de levantar o autobús ata a ponte.
A operación vaise iniciar este martes a primeira hora e farase cun guindastre de gran tonelaxe. Segundo comentou o delegado do Goberno en Galicia, José Miñones, antes se farán as probas de carga no viaducto para garantir que aguanta o peso combinado do guindastre, o autobús e a presión da auga.
A prioridade dos técnicos é levantar o vehículo nunha peza. O alcalde de Cerdedo-Cotobade, Jorge Cubela, comenta que tamén se está estudando a posibilidade de partilo para que o peso da carga sexa menor.
Os servizos de urxencias cortaron árbores e prepararon o terreo para facilitar a recuperación do autobús. Prevese que o caudal do río baixe nas próximas horas e facilite un traballo que non vai ser nada sinxelo, se ben as predicións meteorolóxicas apuntan a unha tregua das precipitacións ata a tarde do mércores.
Un guindastre de gran tonelaxe izará o autobús
Superada a fase do rescate dos feridos e dos corpos chega o momento da investigación: saber as causas que provocaron o accidente. O Delegado do Goberno en Galicia, José Miñones, non desbotou ningunha hipótese e confirmou a participación dun grupo especial da Garda Civil na investigación.
Miñones falou da influencia do mal tempo, pero dixo que os técnicos agardan o izado do autobús. Agárdase que a recuperación do autobús poida botar luz sobre as causas do accidente. Trátase dun vehículo de 6 anos de antigüidade que realizaba a liña Lugo-Vigo para a compañía Monbus.
Segundo confirmou o delegado do Goberno en Galicia, José Miñones, aínda non foi analizada a información do tacógrafo do autobús. O condutor foi un dos superviventes e deu negativo nas probas de alcol e drogas.
Na investigación tamén será determinante a declaración do condutor. Se fose necesario, os técnicos barallan facer unha reconstrución do sinistro.
