As persoas xordas reivindican os seus dereitos lingüístixos no Día Nacional das Linguas de Signos
Aproveitan o día para facerse máis visibles e dar a coñecer a súa lingua entre as persoas oíntes
Santiago é unha das cidades onde se organizaron actos este sábado para conmemorar o Día Nacional das Linguas de Signos. As persoas xordas consideran que este é un día importante para poder ter visibilidade. Por iso, instalaron unha mesa informativa na Alameda para achegarse ás persoas oíntes e, se acaso, dar a coñecer os signos básicos.
"É un día importante que nos dá protagonismo, axuda a derribar barreiras, apoia a nosa identidade, dános visibilidade ante as persoas oíntes. Temos a mesma capacidade, podemos facer calquera cousa. Queremos atraer a xente, que nos recoñeza. Para nós é un orgullo dispoñer da lingua de signos, empodéranos a toda a comunidade", explica Fátima Granja, presidenta da Asociación de Persoas Xordas de Santiago.
A Federación de Asociacións de Persoas Xordas de Galicia imparte cursos presenciais e a distancia, de distintos niveis, a todas as persoas interesadas en comunicarse con esta linguaxe.
"Anímovos a todos a participar. A lingua de signos é moi bonita, é un idioma precioso e estou seguro de que desfrutaredes moitísimo. Anímovos a que veñades a aprender lingua de signos", di Miguel Ángel Carregado, especialista en lingua de signos.
Para as persoas xordas, é un día para reivindicar os seus dereitos lingüísticos.
