As patronais calculan que as perdas pola apagada poden sumar ata 1.600 millóns de euros
O Foro Económico de Galicia estima que na comunidade o dano foi inferior aos 200 millóns
Stellantis deixou de fabricar algo máis de mil coches en Vigo
A Xunta ofrécelle ás empresas axuda para facer posibles reclamacións
A foto repetiuse por toda España. Negocios pechados en Santiago, en Monforte, en Cangas ou en Madrid. Toca facer balance das perdas millonarias que provocou o grande apagamento. Segundo a CEOE, no conxunto do estado os danos poden chegar a mil seiscentos millóns de euros. Algo menos, mil trescentos, calcula a Asociación de Autónomos.
"Agora haberá que ver os danos na mercadoría ou en aparellos que se viron afectados, non só no lucro cesante", explica o presidente da Federación da Asociación de Traballadores Autónomos ATA, Lorenzo Amor.
En Galicia, o Foro Económico estima un impacto de menos de douscentos millóns de euros. Stellantis, por exemplo, deixou de fabricar algo máis de mil coches ata que recuperou a subministración.
"No momento no que se produciu, puidemos facelo en tempo récord e retomar a actividade con normalidade dende o martes pola mañá", relata o director da factoría de Vigo, José Luis Alonso Mosquera. "Ou sexa, que creo que o fixemos moi ben e que, para os efectos que puido ter isto, sacámolo moi ben".
A Xunta ofrécelles colaboración ás empresas para poderen reclamar e pídelle ao Goberno central que invista en redes de transporte de enerxía que eviten cortes.
"Estamos traballando coas empresas dende o primeiro momento para coñecer os danos", adianta a conselleira de Economía, María Jesús Lorenzana, "e, unha vez que se saiba a causa, veremos se hai algún tipo de responsabilidade patrimonial por parte dalgunha administración ou se hai que reclamar apoios económicos".
O Goberno central cre que aínda é cedo para facer un cálculo concreto. O ministro de Economía pensa que as estimacións das patronais son provisionais.
"O que dicimos é que, máis alá destas estimacións, necesitamos ver os datos con claridade para ter unha idea máis clara de cal foi o impacto", contestaba Carlos Cuerpo na rolda de prensa tralo Consello de Ministros.
Con todo, o ministro quere destacar o lado positivo, que a economía española é capaz de superar grandes obstáculos, como fixo coa DINA e agora coa apagada eléctrica.
