As memorias do secretario persoal de Bieito XVI, unha confesión espiñenta para o Vaticano

As memorias do secretario persoal do defunto pontífice emérito Bieito XVI, Georg Gänswein, saen á venda hoxe. Son unhas confesións espiñentas do home que custodiaba desde o ano 2003 os segredos de Joseph Ratzinger e que agora ameazan con sacudir o Vaticano.

Sabendo que as memorias se publicaban hoxe, e en previsión da penitencia, o papa Francisco fixou para este pasado luns, 9 e xaneiro, unha xuntanza co que fora secretario persoal de Bieito XVI, falecido o pasado 31 de decembro aos 95 anos e idade.

Deste encontro non transcenderon os detalles, pero algunhas fontes apuntan a un decepcionado pontífice que pediu ao histórico secretario de Bieito XVI discreción nos próximos días, tendo en conta os temas máis polémicos impresos nas páxinas de 'Nient'altro che a verità', en galego 'Nada máis que a verdade'; un título destacado no escaparate dixital da  editorial Piemme.

A verdade dun arcebispo coñecido como "o guapo do Vaticano" que pretende contradicir as "maliciosas calumnias e escuras manobras que trataron en balde de lanzar sombras sobre o maxisterio e as accións do papa alemán", reza no resumo da editorial.

O papa Francisco quere atallar a polémica e que o libro non se converta nun 'Via Crucis' persoal. O papa Francisco avisaba onte no Ángelus, desde a xanela do Palacio Apostólico do Vaticano, que "a rexouba é unha arma letal que mata, mata o amor, a sociedade e a irmandade", unha mensaxe interpretada como unha suposta reacción ao libro do monseñor.

Tras a morte de Bieito XVI, o futuro do seu secretario está non está claro, sobre todo despois da publicación das memorias; é moi pouco probable que o arcebispo Georg Gänswein regrese ao seu cargo de prefecto da Casa Pontificia, unha especie de xefe de protocolo. A opción podería ser asignarlle unha nunciatura, que saia do Vaticano para dar clases nunha universidade católica no estranxeiro ou o seu regreso a súa Alemaña natal.

Nas súas 336 páxinas, Gänswein, de 66 anos, secretario e leal colaborador de Ratzinger, concéntrase na particularidade da última década, a inusual convivencia de dous papas: Bieito XVI, retirado desde a súa histórica renuncia en 2013 e ídolo do sector máis conservador, e o seu sucesor, Francisco, centro de ataques do mesmo.

Entre outras moitas cousas, Gänswein reprocha a Francisco a súa caída en desgraza como prefecto da Casa Pontificia, un dos cargos máis importantes da Curia, pois o papa arxentino encargoulle coidar de Ratzinger no seu retiro no mosteiro vaticano de Mater Ecclesiae. E asegura que o pontífice e teólogo alemán considerou un erro o documento 'Traditionis Custodes' co que Francisco puxo coto ás misas en latín, propias de tempos previos ao Concilio Vaticano II, rebelando os membros máis tradicionalistas da Igrexa.