PP, PSOE e BNG plantan o pleno de Ourense tras chamar Jácome "etarras" aos nacionalistas

Os grupos municipais do PP, PSdeG e BNG decidiron abandonar o pleno ordinario celebrado este venres no Concello de Ourense en sinal de protesta polas palabras do alcalde, Gonzalo Pérez Jácome acusando ao PP de "votar cos etarras" en referencia aos nacionalistas.

Nunha tensa xornada celebrada este venres, os tres grupos políticos decidiron abandonar a sesión cando aínda quedaban varios puntos por debaterse tras afear a actitude do rexedor ourensán, á vez que avanzaron que analizarán nos próximos días posibles actuacións ante a actitude mantida polo alcalde durante o pleno.

A polémica produciuse durante o debate dunha das modificacións de crédito, despois de que o PP optase por votar en contra de varias delas, o mesmo que fixo o BNG. Nese momento, Jácome tomou a palabra para recriminar ao PP a súa decisión e acusou aos populares de "votar cos etarras".

"O PP e o BNG agora fan piña. O PP cos etarras, manda carallo. Quen o diría?", proclamou o rexedor.

Inmediatamente, o portavoz do BNG, Luís Seara, tomou a palabra para pedirlle que retirase o devandito.

"Non son nin etarras nin violentos: somos enormemente demócratas e entendemos a democracia de forma ampla", advertiu o concelleiro nacionalista.

Lonxe de retractarse, Jácome lembrou ao BNG como tomou "pola forza" a alcaldía de Allariz.

"Sodes violentos e estades con Bildu", apostilou o rexedor ante as críticas da oposición.

Nese momento, as tres formacións políticas ao unísono levantáronse dos seus escanos e abandonaron o salón de plenos, ante as críticas do alcalde ourensán, que reprochou aos distintos grupos "o que lles importa" a cidade.

"Se tivésemos maioría absoluta si que funcionaría a cidade e isto iría para arriba e non con xente que está a bloquear todo o intre", ironizou Jácome.

Coa marcha dos grupos, o goberno local decidiu retirar o resto de puntos que incluía a orde do día. 

O alcalde afea a marcha da oposición e alega que a el lle chamaron "nazi" ou "fascista"

Gonzalo Pérez Jácome, cuestionou a decisión dos grupos políticos PP, PSOE e BNG de abandonar o pleno municipal e lembrou que a el en varias ocasións tacháronlle de "nazi" e "fascista".

Durante a celebración da sesión ordinaria e, despois, nas súas redes sociais, o rexedor ourensán acusou á oposición de facerse "a indignada" cando "levan toda a vida chamándome a min fascista e nazi".

"Indignados? Pero se eles levan toda a vida chamándome a min fascista e nazi. E agora se mosquean porque lles falo na súa linguaxe", manifestou Pérez Jácome, quen lembrou como no mandato 2011-2015 unha concelleira nacionalista "pronunciouse a favor de Arnaldo Otegi" durante un pleno do Concello de Ourense.

Jácome cuestionou tamén a postura do PP e lembrou que o propio presidente do partido, Alberto Núñez Feijóo, "acusou de vínculos ao BNG coa ETA".