As inundacións que afectan varios países de Asia deixan máis dun milleiro de falecidos

As inundacións que afectan Indonesia, Sri Lanka e Tailandia, por un forte temporal de choiva, deixan este luns entre 1.012 e 1.114 falecidos, coa illa indonesia de Sumatra como a máis afectada polo momento.

Segundo o último balance da Axencia Nacional para a Xestión de Desastres (BNPB) de Indonesia, a cifra de mortes subiu ata 604 este luns, mentres que o total de desaparecidos descendeu de 508 a 464, con 2.600 feridos e uns 570.000 evacuados.

A choiva, que ocasionou o desbordamento de ríos e esvaraduras de terra no arquipélago, afectaron 1,5 millóns de persoas especialmente nas provincias de Sumatra Setentrional, Aceh e Sumatra Occidental, nas que viven máis de 280.000 persoas.

Testemuños dos afectados relatan como vivendas e comercios foron arrasados pola enchente dos ríos, obrigando familias enteiras a improvisar refuxios xunto aos poucos muros que quedaron en pé.

Piden a declaración de desastre nacional

A pesar de que as inundacións, vinculadas ás copiosas choivas provocadas polo monzón e un inusual ciclón tropical que impactou a illa a semana pasada, comezaron a ceder nalgunhas zonas, hai polo menos tres subdistritos da provincia de Aceh, norte de Sumatra, aos que os rescatistas non puideron acceder.

A situación do desastre superou a algúns gobernos locais que, xunto a grupos civís, solicitaron ao Goberno a declaración de desastre nacional, algo que sucedeu en só tres ocasións nas últimas tres décadas, incluída a pandemia da covid e o tsunami do océano Índico en 2004.

A Indonesia súmase o cálculo de danos e vítimas de Tailandia, onde a auga retrocedeu nos últimos días, cun balance actualizado este luns de 176 mortes e perdas multimillonarias en varias provincias do sur.

Ademais, segue aumentado o número de afectados polas inundacións en Sri Lanka, onde as autoridades elevaron hoxe a 334 o número de falecementos confirmados, mentres 337 persoas seguen desaparecidas.