Publicador de contidos

Publicador de contidos

As forzas de seguridade liberan unha muller que foi retida seis días nun piso no Porriño

As forzas de seguridade liberan unha muller que foi retida seis días nun piso no Porriño

A Policía Local do Porriño e a Garda Civil detiveron o presunto autor dos feitos ao que se lle imputa un delito de Detención Ilegal e un delito de agresión sexual e lesións

A vítima alertou da súa situación lanzando notas manuscritas pola ventá mentres o home durmía

G24.gal 26/07/2022 11:01 Última actualización 26/07/2022 15:10

Axentes da Policía Local do Porriño e da Garda Civil do Porriño liberaron este luns unha muller que levaba retida contra a súa vontade seis días nunha céntrica vivenda do Porriño e detiveron o presunto responsable dos feitos, un home de 26 anos de idade e veciño da vila, por senllos delitos de detención ilegal e agresión sexual e lesións.

A policía recibiu o aviso a través do 112 de que unha muller enviara dúas notas manuscritas en papel por unha fiestra onde alertaba de que se atopaba retida en contra da súa vontade nunha vivenda e pedía axuda. Unha veciña atopou unha das notas, en que facilitaba datos do presunto autor e o enderezo de onde se atopaba, e púxoo en coñecemento do 112 .

Tras realizar as primeiras pescudas, comprobaron que o enderezo e os datos facilitados pola vítima coincidían cos dun varón que se atopaba en busca e captura por diversos xulgados da provincia e sobre o que pesaba tamén unha orde de ingreso en prisión. O home protagonizara supostamente un episodio similar nun concello limítrofe, sen poder ser detido.

Os axentes optaron por tirar a porta pola forza utilizando un ariete. Ao acceder á vivenda atoparon o home durmindo na cama e a vítima aterrorizada e en estado de nerviosismo. De inmediato e sen darlle tempo a reaccionar procederon á súa detención.

A moza, que presentaba diversos hematomas no corpo -segundo manifestou ela- producidos polo agresor co fin de manter relacións sexuais, relatou aos axentes que levaba dende o día 19 de xullo encerrada na vivenda, sen que se lle deixase comunicarse con ninguén do exterior.

A vítima foi trasladada pola ambulancia do 061, acompañada en todo momento por unha axente da Policía Local do Porriño, ao Hospital Álvaro Cunqueiro, onde se iniciou o protocolo de agresións sexuais, e foi recoñecida pola médica forense. A muller interpuxo unha denuncia por todo o acontecido.

O home foi detido e posto a disposición xudicial como presunto autor dos delitos de detención ilegal e agresión sexual e lesións. A familia da vítima denunciara a súa desaparición tras levar días sen ter coñecemento do seu paradoiro.

Publicidade
Publicidade
Publicidade
Publicidade
Pódeche interesar

Publicador de contidos