As farmacias galegas, preparadas para ofrecer pastilleiros coas tomas personalizadas

As farmacias galegas xa están en disposición de ofrecer, de xeito regulado, un sistema de dosificación de medicamentos no que o propio farmacéutico se encarga de preparar individualmente as pastillas e pílulas de cada toma.

Nun pastilleiro distribuen as medicinas, tal e como as prescribe o médico, e revisan caducidades, duplicidades, incompatibilidades. É un sistema pensado para evitar esquecementos e dobres tomas.

"En caso de que teñas unha medicación que teñas que tomar pola mañá e pola noite e outra que sexa pola mañá e a mediodía, pois así é máis doado, porque ao ver o alvéolo baleiro xa sabes que a tomaches ben", explica Natalia Martínez, farmacéutica. 

Cómodo e seguro, facilita o control por parte dos coidadores no caso de persoas dependentes. Tamén é recomendable para viaxes e desprazamentos: en lugar de levar seis ou sete caixas, hai que levar só un envase.  Está demostrado que este sistema mellora a adherencia e eficacia dos tratamentos e a saúde dos pacientes, que poden solicitalo na súa farmacia.

"O único que hai que facer é preguntar na súa farmacia se o están ofertando e asinar un consentimento informado, porque nós custodiamos todos os medicamentos para que non poidan estar tomando do pastilleiro e das caixas. Xa nos encargamos tamén de vixiar se a medicación se está acabando, se a teñen que renovar ou se teñen que avisar o médico", explica a farmacéutica Natalia Martínez.

O servizo ten aquí un custo de tres euros semanais. Os farmacéuticos propoñen que, nos casos en que sexan recomendables, os prescriba o médico; e que sexan gratuítos para as persoas que teñen as medicinas de balde.