As comunidades reprochan a Sanidade non lograr acordo sobre o Estatuto Marco

O Consello Interterritorial do Sistema Nacional de Saúde (CISNS) celebrado este mércores para abordar a reforma do Estatuto Marco e a folga de médicos terminou sen acordos ante o rexeitamento das comunidades autónomas a votar os puntos da orde do día, que contemplaban acordos e recomendacións relativas ás reivindicacións dos profesionais sanitarios.

As comunidades autónomas reprocharon ao Ministerio de Sanidade non lograr un acordo para reformar o estatuto marco e acusaron a ministra, Mónica García, de non escoitar os profesionais, sindicatos e os gobernos autonómicos.

Así o advertiu, e fíxoo en nome dos conselleiros autonómicos de Saúde e Sanidade, o conselleiro vasco, Alberto Martínez, tras a reunión do CISNS, un encontro en que considerou que "se perdeu unha oportunidade" para avanzar na resolución do conflito.

Ao termo do encontro, Martínez asegurou que as autonomías acudiron ao encontro "unidas" para defender aos pacientes, os profesionais do SNS e que o fixeron coa vontade de traballar para resolver os problemas que están a sufrir os cidadáns.

"Problemas -dixo- xerados por un Ministerio de Sanidade que non soubo chegar a un acordo para reformar o estatuto marco, o cal é unha responsabilidade".

Pero, a reunión non serviu para achegar posicións, e Martínez rexeitou que a posición común expresada polas comunidades responda a "diferenzas partidistas", xa que os gobernos autonómicos, ao seu xuízo, actuaron cun obxectivo compartido de protexer a pacientes e profesionais sanitarios.

"A ministra novamente non escoitou e non conta co apoio nin dos profesionais, nin dos sindicatos nin das comunidades autónomas", asegurou Martínez.

A declaración conxunta das comunidades chega despois de que os conselleiros rexistraran este mércores no Ministerio un acordo consensuado por todas elas -excepto Cataluña, cuxa conselleira está de baixa- no que reclamaban reabrir con urxencia un proceso de diálogo sobre o Estatuto Marco e advertían de que o conflito xerado pola súa tramitación excede das súas competencias.

Durante a reunión, a ministra de Sanidade defendeu que o Goberno xa incorporou ao anteproxecto todas as reivindicacións dos médicos que corresponden ao ámbito estatal e pediu ás autonomías que se comprometesen con aquelas demandas que dependen das súas competencias, especialmente as relacionadas coas gardas, a xornada laboral e determinados aspectos retributivos.

"As comunidades autónomas decidiron rexeitar comprometerse con estas reivindicacións que solucionarían o conflito. Hoxe as comunidades autónomas podían desbloquear o conflito asumindo o seu parte das competencias (...) e decidiron non facelo, decidiron mirar para outro lado", aseverou Mónica García.

García, subliñou que non vai "renunciar" ao Estatuto Marco para a profesión sanitaria porque iso supoñería "traizoar" aos seus compañeiros e acusou ás comunidades autónomas de "facer do can do hortelano", que nin "resolven nin deixan resolver".

"Hoxe as comunidades podían poñer o seu granito de area para desarticular o conflito", denunciou a ministra, que lembrou que este pleno convocouse a pedimento das propias comunidades.

A Xunta apunta á “soidade” da ministra

O conselleiro de Sanidade, Antonio Gómez Caamaño, puxo o foco na “soidade” da ministra de Sanidade, Monica Garcia, en canto á reforma do Estatuto Marco ante a que todas as comunidades autónomas están en contra.

Antes de participar na sesión extraordinaria do pleno do Consello Interterritorial do Sistema Nacional de Saúde, o conselleiro insistiu en que o Goberno central é a administración competente para modificar e aprobar o Estatuto Marco dado que non pode ser modificada ou aprobada polas comunidades autónomas para incluír as reclamacións que o colectivo médico demanda.

Con todo, incidiu en que as comunidades manteñen a súa vontade de colaboración para solucionar o problema xerado polo Ministerio de Sanidade, “sempre e cando o diálogo cos actores implicados sexa real”.

Para rematar, o responsable da carteira sanitaria lembrou que en Galicia os paros convocados contra a reforma do Estatuto Marco que promove o Goberno central desde o mes de decembro obrigaron a suspender case 245.000 actos médicos. 

Os sindicatos acusan á ministra de "confundir" á opinión pública

 O Comité de Folga médico acusou á ministra de Sanidade de renunciar ao diálogo como vía para resolver o conflito do Estatuto Marco e de intentar "confundir" á opinión pública con comunicados "tendenciosos e inexactos", alén de expor solucións que considera "xuridicamente inviables" e responsabilizar aos médicos da situación..

Neste contexto, o Comité sostén que é falso que o Anteproxecto de lei do Estatuto Marco recolla todas as súas reivindicacións, salvo as xuridicamente inviables ou as que corresponden ao ámbito competencial das comunidades autónomas, tal e como asegura o Ministerio de Sanidade.

Así mesmo, sostén que o Ministerio se opuxo á creación dun Estatuto da Profesión Médica e Facultativa non por unha imposibilidade xurídica, senón por unha decisión política, algo que, segundo asegura, o propio departamento recoñeceulle. Ademais, engade que o seu rexeitamento a un Estatuto propio non obedece a un "posicionamento deliberado".

Respecto á mesa de negociación específica para o colectivo, desmente a Sanidade e nega que a súa creación dependa das comunidades autónomas:

"A creación das mesas autonómicas de negociación propias do noso colectivo require modificacións previas da lexislación básica do Estado e posicionamentos da Mesa Xeral de Negociación cuxa competencia corresponde en exclusiva ao ministerio".

Nesta liña, tamén indica que o departamento que lidera García negouse a introducir no texto a xornada semanal máxima obrigatoria de 35 horas e a fixar retribucións mínimas para a hora de garda.

En materia de xubilación, sostén que o Ministerio terxiversa de forma deliberada a súa petición de incorporar coeficientes de corrección da idade de xubilación baseados no exceso de xornada sostido e estrutural que soporta o colectivo.