Gravan os ladróns levando aceiro por valor de 12.000 euros dunha empresa de Ponteceso

A empresa Glaücor Enxeñería dedícase ao deseño e fabricación de instalacións industriais e maquinaria nestas instalacións do Polígono da Tella en Ponteceso. No último ano sufriron dous roubos semellantes. Na primeira ocasión deixaran material de aceiro inoxidable fóra desta nave principal e leváronllo. Na segunda ocasión, hai un par de meses, foi diante destoutra nave que empregan como almacén. As cámaras de seguridade captaron a acción dos ladróns que actuaron con total impunidade.

O material subtraído nos dous roubos ten un valor próximo aos 12.000 euros. Os responsables da empresa supoñen que o destino é a chatarra.

Tras denunciar os feitos entregando as gravacións, a Garda Civil iniciou unha investigación que permitiu identificar os presuntos responsables do furto: dúas mulleres e un home, veciños da Coruña. Dous deles teñen antecedentes por distintos delitos. Os responsables da empresa Glaücor tamén denunciaron ser obxecto de extorsión por parte de dous homes que se ofreceron a realizar unha demostración de pulído e afiado de brocas.

Na empresa non lles convenceu o traballo e os individuos volveron en varias ocasións esixindo con ameazas o pago de 400 euros pola demostración. Souberon que no polígono outras empresas sufriran situacións semellantes. O caso está en mans da Garda Civil.