As aeroliñas cancelan voos e trasladan a alza do combustible aos billetes
A Axencia Internacional da Enerxía calcula que se necesitarán máis de dous anos para recuperar a situación
Os prezos das rutas aéreas comezan a escalada.
"Están máis caros, claro", di unha viaxeira.
As reservas de combustible permiten manter o prezo a curto prazo, pero hai aeroliñas coma Volotea que xa comezaron a trasladar a suba do combustible ao billete.
"O carburante é un elemento fundamental. Representa o 25 % dos custos totais polo que ten un impacto enorme", explica Marco Sansavini, CEO de Iberia.
Compañías coma KLM ou Lufthansa comezan a cancelar rutas e deixar avións en terra. A alza de prezos chega ás portas da tempada de verán.
"Houbo un certo parón das reservas porque a xente está intentando ver qué vai pasar de cara a este verán", asegura o Presidente de Aeroliñas Españolas, Javier Gándara.
Desde as axencias advirten.
"Se o billete está comprado, non poden subir o prezo", di Óscar Regal, da axencia de viaxes Embaixador.
Desde o sector recomendan mercar os billetes canto antes en previsión de que o conflito se manteña.
"Despois da parada de hai un mes agora é evidente que as compañías utilizan rutas seguras", di Óscar Regal.
A Axencia Internacional da Enerxía calcula que serán necesarios polo menos dous anos para recuperar a situación previa ao bloqueo de Ormuz.
