Arturs Kurucs gaña a continuidade no Breogán
O escolta letón chegou en xaneiro procedente do UCAM Murcia e foi fundamental para Luis Casimiro
O Breogán confirmou a renovación do letón Arturs Kurucs, un xogador que incorporou no mes de xaneiro e que tivo un gran rendemento nos dezaoito partidos que xogou coa camisola do equipo lugués. Procedente do UCAM Murcia a adaptación de Kurucs ao sistema de Luis Casimiro resultou inmediata.
En Lugo acreditou os mellores números na súa traxectoria en ACB. Mediou 9,1 puntos, 1,7 rebotes e 1,4 asistencias en 24 minutos. Viña de ter un papel residual en UCAM ou en Baskonia e precisaba sentirse importante. No Breogán logrouno desde o primeiro partido. Tivo unha máxima anotación de 20 puntos o día do Baxi Manresa e tamén conseguiu o seu máximo en triplas nun partido ao asinar cinco diante do Gran Canaria nun dos últimos partidos da temporada.
