Armengol di que non mentiu ao declarar que non coñecía a Aldama, porque non o lembraba
"Nin mentín nin ocultei información, direino unha e mil veces", dixo a presidenta do Congreso, quen explicou que o comisionista acudira unha vez á sede do Goberno de Baleares acompañado ao director xeral de Air Europa e que só ao repasar a axenda viu que estaba presente nesa reunión
A presidenta do Congreso Francina Armengol asegurou este martes no Senado que non mentiu na súa comparecencia anterior polo caso Koldo cando dixo que non coñecía o comisionista Víctor de Aldama, porque non o lembraba, aínda que puidese estar anos antes nunha reunión como acompañante.
Armengol explicouno así no primeiro interrogatorio da súa segunda comparecencia na comisión de investigación do caso Koldo no Senado, trece meses despois da primeira, ao preguntarlle Ángel Pelayo Gordillo, senador de Vox, por esa presunta mentira, motivo polo cal foi chamada a repetir declaración na Cámara Alta.
"Non mentín, dixen todo o que sei, todo o que lembraba e todo o que sabía", aseverou a tamén líder do PSIB-PSOE e expresidenta do Govern balear ao reiterar a Gordillo que non pode coñecer as miles de persoas que recibiu nos seus cargos políticos.
Armengol indicou que cando De Aldama desvelou que estivera con ela no Consolat del Mar, sede da Presidencia balear, repasou xunto á súa secretaria a axenda e atopou que figurou unha vez como acompañante do empresario Pepe Hidalgo, da aeroliña Air Europa.
"Nin mentín nin ocultei información, direino unha e mil veces", reiterou Armengol, mentres Gordillo afirmou que non a cre e que, por mentir, debería dimitir.
