Tres 'narcolanchas' aparecen abandonadas nas praias de Ribeira
Tres 'narcolanchas' aparecen abandonadas nas praias de Ribeira
Televisión de Galicia puido confirmar que as embarcacións traían un importante alixo de cocaína e que a descarga se fixo esta madrugada
Só as dúas embarcacións máis grandes teñen capacidade para trasportar 6 toneladas de cocaína
Unha das narcolanchas apareceu varada e abandonada na praia do Vilar, en Corrubedo. Cunhas dimensións descomunais. Tres motores de cen cabalos cada un, máis de dez metros de eslora, e na proa alcanza a altura dunha persoa. Foi un particular o que a viu e avisou os servizos de emerxencia.
A outra narcolancha de grandes dimensións apareceu na praia de Espiñeirido. Hai unha terceira embarcación, de menor dimensión, que os axentes si que puideron retirar nun primeiro momento e agora permanece baixo custodia policial.
Queda moito por investigar pero as primeiras pescudas apuntan a que as narcolanchas foron abandonadas tras unha descarga de droga, parece seguro que foi cocaína e nunha gran cantidade, pero aínda por determinar. O que si transcendeu é que só as dúas embarcacións máis grandes terían espazo suficiente para transportar ata 6 toneladas de cocaína entre as dúas.
Será a investigación agora o que o determine. As forzas de seguridade buscaron pistas durante toda a xornada, con ducias de espectadores. Foron moitos os curiosos que durante toda a xornada achegáronse á praia para ver de preto as narcolanchas.
