Aparece unha bala nun dos cristais blindados da sede en Ferrol da Axencia Tributaria
As pescudas iniciais apuntan a que o disparo puido producirse durante unha liorta ou altercado nas inmediacións
Varios veciños escoitaron uns "ruídos" á media tarde pero ninguén viu nada
A sede da Axencia Tributaria en Ferrol, situada no barrio de Caranza, converteuse no centro dunha investigación policial tras o achado dunha bala incrustada nunha das súas cristaleiras. Empregados da delegación alertaron ás autoridades ao descubrir os danos na ventá de seguridade.
Axentes da Policía Nacional, pertencentes á comisaría de Ferrol-Narón compareceron no lugar e confirmaron o impacto. O proxectil permanece aloxado entre os cristais blindados, o que impediu a súa recuperación inmediata para unha análise máis profunda por parte da Policía Científica.
Espérase que, unha vez extraída, a bala proporcione datos cruciais para identificar a arma utilizada. As pescudas iniciais apuntan a que o disparo puido producirse durante unha liorta ou altercado nas inmediacións.
Os investigadores manexan varias hipóteses, incluíndo un posible enfrontamento entre clans asentados no barrio durante a tarde este luns. Cabe destacar que o incidente non foi alertado por ningún veciño no momento dos feitos.
"Estaba na casa e escoitei como un 'pla,pla'. Asusteime, baixei a tele e dixen 'ese son?, pero como non escoitei máis..."
"Eu escoitei un ruído pero nin me asomei a ver que era porque sinto moitos asi. Bum e xa está"
O impacto na delegación de Facenda produciuse a unha altura correspondente a un segundo piso e, segundo as primeiras estimacións, tivo lugar despois do horario de peche da Axencia Tributaria, que estes días están cunha gran trasfega de cidadáns, ao estar actualmente coa campaña da renda 2024.
A Policía mantén abertas todas as liñas de investigación para esclarecer a orixe e as circunstancias deste suceso.
