Localizan en bo estado de saúde o home de 85 anos que desaparecera en Coirós
Desde o xoves fixéronse batidas coordinadas pola Garda Civil e o dispositivo reforzouse este venres cun helicóptero e con drons
O home padece alzhéimer e na última comunicación que houbera coa familia dixera que caera nun monte
O operativo de busca coordinado en Coirós pola Garda Civil para localizar a Jesús María Corral, un home de 85 anos de idade que padece alzhéimer, rematou con éxito despois de localizalo en bo estado de saúde preto do centro da localidade.
O 112 Galicia informou de que tivo constancia da incidencia a través das chamadas de varios particulares, sobre as 20:45 horas deste xoves, e comezou a busca na zona do Fontelo, en Santa María de Ois, en Coirós.
Fixéronse batidas coordinadas pola Garda Civil e o dispositivo reforzouse este venres cun helicóptero e con drons.
Nas tarefas de busca participaron efectivos da Garda Civil, as Agrupacións de Protección Civil de Betanzos e Abegondo e unha vintena de veciños e familiares.
