O garda civil de Ferrol que matou a súa exparella usou unha arma subtraída do cuartel de Zamora
O agresor, de 49 anos, tivera vixente unha orde de afastamento da súa exparella e estaba condenado en sentenza firme por violencia machista
Esta semana notificáraselle a súa expulsión do corpo e xa se lle retirara a pistola regulamentaria
Llanes despediu este mércores cunha concentración silenciosa á súa veciña Laura, de 50 anos e nai de tres fillos
O garda civil de Ferrol que asasinou este mércores en Llanes a súa exparella e tamén axente do instituto armado, Laura Cruz, utilizou para cometer o crime unha arma que subtraera no cuartel de Zamora no que estaba destinado, segundo informaron a EFE próximas á investigación.
A agresión produciuse ao redor das 13:30 horas, cando o axente accedeu ao cuartel de Llanes, no que a muller traballaba desde hai unha década, e el tamén estivera destinado, e chegou ás oficinas onde se atopaba a axente, á que disparou causándolle a morte.
No seu intento de fuxida tamén disparou na perna a un tenente que intentou intervir -xa se atopa fóra de perigo nun centro hospitalario- e antes de abandonar o cuartel estableceu un tiroteo con outros axentes ata que foi abatido, falecendo horas despois cando era evacuado en ambulancia.
Fora condenado por violencia machista
O agresor, de 49 anos e natural de Ferrol, tivera vixente unha orde de afastamento da súa exparella e estaba condenado en sentenza firme por violencia machista. Esta semana notificóuselle a súa expulsión do corpo que xa lle retirara a pistola regulamentaria no seu actual destino de Zamora, onde estaba destinado no servizo de cinoloxía.
Os veciños de LLanes despiden a Laura
Llanes despediu este mércores cunha concentración silenciosa á súa veciña Laura, a garda civil de 50 anos e nai de tres fillos asasinada pola súa exparella. Pancartas con lendas como 'O machismo mata' foron exhibidas polos participantes na manifestación de repulsa e condena ao primeiro crime machista do ano en Asturias.
Entre os asistentes atopábase o presidente do Principado, Adrián Barbón, así como a delegada do Goberno, Adriana Lastra, e dirixentes autonómicos de PP e Foro. "Llanes está consternada", sinalou a EFE Enrique Riestra, o alcalde da localidade, na que se declararon dous días de loito oficial por unha veciña "moi involucrada na vida social" de Llanes.
Con este caso e co rexistrado tamén onte en Murcia, serían 35 mulleres as vítimas mortais da violencia de xénero no que vai de ano, 1.375 desde 2003, e a primeira en Asturias en 2026. As vítimas da violencia machista e a súa contorna poden pedir axuda en distintos recursos activos todos os días da semana e as 24 horas do día: o teléfono 016, o correo electrónico 016-online@igualdad.gob.es e a canle do WhatsApp no número 600 000 016.
