Ana Pontón ve a Rueda como o "presidente do estancamento" e acúsao de deixar unha Galicia máis débil

A portavoz nacional do BNG, Ana Pontón, dixo este mércores que a intervención de Alfonso Rueda no debate de política xeral de metade de lexislatura e que serve de termómetro para medir a situación en Galicia acreditou que el é “o presidente do estancamento” e que converteu Galicia nunha Comunidade “máis débil”.

A líder da oposición detectou que o discurso do mandatario galego estivo cheo de “vellas receitas” e de “promesas incumpridas” que non repercuten en mellorar a vida dos cidadáns xa que desde a Xunta “estase empeorando a vida dos galegos”.

Lamentou os 17 anos continuos de gobernos do PPdeG que fixeron que, por falta de ambición, Galicia perdese oportunidades aínda que debido á fortaleza do territorio aínda hai “esperanza” para mellorar cando cambie o signo político da Xunta de Galicia.

“No BNG temos unha convicción clara, Galicia merece máis e Galicia pode máis”, sentenciou Pontón, que ao longo da súa intervención lembrou moitas das propostas que a súa formación quere impulsar en Galicia.

Pontón desgranou iniciativas ideadas polo “Goberno alternativo do BNG” que conta cun proxecto ambicioso que “poña o noso país á vangarda das nacións máis avanzadas” porque, parafraseou, “como dicía Begoña Caamaño -homenaxeada do Día das Letras- é momento de cambiar o mundo”.

Pontón, arroupada por numerosos alcaldes nacionalistas e cargos do BNG, fixo fincapé nas propostas do seu grupo nos piares do estado de benestar e recriminou á Xunta o desmantelamento dos servizos sociais, da sanidade e da educación pública.

En todos estes ámbitos, reprochou Pontón, o PP optou por deteriorar a oferta pública co obxectivo de “beneficiar a uns poucos, porque se deben á sanidade privada e ás empresas amigas do PP”.

Así, fronte ao “recorte” en atención primaria e as longas listas de espera, o Bloque propón cubrir todas as prazas de médicos vacantes, un plan de choque para o sector e aumentar os fondos destinados a Atención Primaria ata chegar ao 25 % do orzamento de sanidade.

A nacionalista insistiu na urxencia de dotar de máis fondos a sanidade pública, que necesita un cambio de modelo, porque en Galicia “antes ias ao médico coa tarxeta sanitaria e agora, se non queres esperar, tes que ir á privada coa tarxeta bancaria”.

Denunciou tamén a situación no servizo de atención aos maiores que, ao seu xuízo, non se atendeu nos últimos anos xa que o ratio de profesionais en residencias é o mesmo que en 1996: “30 anos despois, ningunha mellora”.

Na listaxe de incumprimentos neste campo, Pontón reprochou a falta de novas residencias ou de centros de coidados intermedios, que foron anunciados en numerosas ocasións, que se intentan compensar con “cheques miseria”.

Ademais de promesas incumpridas, Pontón tamén cargou coa falta de control nas residencias onde se detectaron “casos estremecedores” malia os que “mantén aí á conselleira de Política Social”.

En educación censurou o recorte no número de profesores e a eliminación do programa de gratuidade de libros de texto que impulsara o goberno bipartito que gobernou Galicia entre 2005 e 2009.

E criticou unha política fiscal que deixa as arcas galegas con menos fondos para o investimento.