Rueda pon en valor "a estabilidade" do seu Goberno e o compromiso de servir a Galicia

O presidente da Xunta, Alfonso Rueda rematou o seu discurso no Debate de Política Xeral, antes da última contrarréplica, comprometéndose a defender os intereses dos galegos por riba de todo. O presidente puxo en valor "a estabilidade do seu Goberno", reivindicou a política "do sentidiño" e dixo que o seu modelo é a xestión responsable que cumpre servindo a Galicia.

Rueda iniciou a súa intervención no debate sobre o estado da autonomía reivindicando a súa "política sólida" coa que vai afrontar os desafíos de Galicia "sen medos, sen hipotecas e sen vacilacións", asegurou.

Neste segundo debate de política xeral da lexislatura, que comezou este mércores no Parlamento de Galicia, asegurou que pode presentarse cos compromisos cumpridos, cunha porcentaxe do "85 %" dos comprometidos para esta lexislatura xa en marcha, e ademais resaltou que iso se produce nun momento político que é cada vez "máis frívolo e falto de compromiso".

"Adquirir compromiso está ao alcance de calquera, pero para cumprilos fan falta principios, determinación e un equipo que axude e acompañe", considerou, antes de reivindicar "a solidez que dá facer o que se promete" e o "gobernar para servir e non só para estar no cargo ou sobrevivir".

Cando a polarización "parece unha condena", dixo Rueda, a comunidade galega é capaz de seguir o seu "propio camiño" con "prudencia, humildade e tolerancia", o que resumiu co seu reiterado lema de "Galicia calidade", que "debe escoitarse no mundo enteiro".

Vivenda e políticas sociais

Rueda avanzou que a administración autonómica reservará o 30 % das vivendas públicas en venda a persoas de entre 36 e 45 anos e elevará o límite máximo de renda para acceder a unha vivenda pública ata catro veces o IPREM, o que significa, segundo explicou o titular do Gobierno galego, que unha parella cun fillo que ata o momento tiña un teito de ingresos de 2.250 euros brutos mensuais, agora pasa a máis de 3.500 euros.

Así o anunciou ao comezo do debate sobre o estado da autonomía, que se celebra este mércores na Cámara galega, onde detallou que, ademais, no caso das familias numerosas, o teito elevarase a 4,5 veces o IPREM, polo que se poderá acceder a unha vivenda protexida sempre que non se superen os 4.150 euros brutos mensuais de ingresos.

"Facemos isto porque cremos que a vivenda pública e protexida debe estar ao alcance de cantas máis persoas mellor" e especialmente se son pais e nais, ao entender que "son as persoas que máis dificultades están a ter para acceder a unha vivenda​​​​", manifestou o presidente da Xunta.

Máis aló dos novos anuncios, Rueda puxo en valor que o seu Executivo xa demostrou que a vivenda é un obxectivo "constante e irrenunciable" para a Xunta, polo que considera que xa cumpriu algúns dos compromisos adquiridos durante a campaña electoral de 2024.

Deste xeito asegurou que xa están en marcha -nalgún dos seus trámites- "o cen por cento" das vivendas públicas comprometidas de forma que se pasará de 4.000 vivendas desta condición ata as 8.000, duplicando o número dispoñible.

"O cento por cento están en marcha e en poucos meses comezaremos a entregar as primeiras chaves en Pontevedra, Santiago e así sucesivamente", resumiu Rueda.

Reivindicou a xestión da Xunta fronte ás posicións da esquerda nesta materia que, dixo, no caso da Coruña, que coa posta en marcha da zona tensionada -a única en vigor en Galicia- reduciu as vivendas dispoñibles para alugar.

Fronte a iso, "nós témolo claro: menos dogmas e máis obras de construción", concluíu.

Galicia bonificará o 100 % do imposto de actos xurídicos documentados para vivendas protexidas

Rueda anunciou que, a partir do ano que vén, Galicia bonificará o 100 % do imposto de actos xurídicos documentados para vivendas protexidas.

O presidente da Xunta explicou que se trata dun tributo que paga o promotor en varias fases e o comprador no momento da adquisición da obra nova.

Ata o de agora, conforme detallou no seu discurso no debate de política xeral, por unha vivenda protexida de 100 metros de superficie pagábanse ata 15.000 euros deste imposto. Agora pasarán a ser cero para favorecer a colaboración público-privada na construción de vivenda protexida.

Tamén anunciou que a Administración autonómica aprobará nas próximas semanas unha nova oferta de emprego público que esgotará a taxa de reposición e contará con máis de 800 prazas.

Tal e como defendeu na súa intervención no debate anual sobre política xeral que se celebra este mércores no Parlamento galego, estes novos funcionarios "servirán a Galicia coa mesma dedicación que os que levan todos estes anos na Administración autonómica".

Ampliación de capital de Recursos de Galicia para unha maior participación pública en proxectos

O xefe do Executivo galego avanzou que, nas próximas semanas, a Administración autonómica, xunto cos seus socios, levará a cabo unha ampliación de capital de Recursos de Galicia para que as galegas e galegos xestionen ou participen en cada vez máis instalacións e explotacións.

No seu discurso de arranque do debate de política xeral, Rueda mostrouse convencido de que o desenvolvemento das renovables ten que vir acompañado de beneficios directos para os lugares nos que se instalen, para o que a Xunta aposta pola fórmula "pioneira" de Recursos de Galicia.

O máximo mandatario autonómico, que se referiu aos descontos do 80 % na factura da luz cos que contará medio milleiro de fogares da Mariña, sostivo que isto é tan só unha mostra do que se pode lograr coa extensión deste sistema.

Por iso, subliñou que o Goberno galego blindará o retorno social e económico, con novos descontos nas facturas enerxéticas para particulares e empresas.

O presidente da Xunta sostivo que "sempre que haxa unha oportunidade, compatible co respecto industrial, compatible co respecto ás normas" o Goberno galego "vai aproveitala" e asegurou que "non ten ningún sentido deixalas por sistema a outros".

Todo iso nun discurso no que cargou contra o "uso partidista" por parte do Goberno da rede eléctrica para "estrangular proxectos que noutros territorios contarían co apoio incondicional", en referencia a Altri. "Toda unha provincia sen planificación eléctrica por unha manobra política", censurou.

Sector aeroespacial e minas 

Na súa comparecencia no Pazo do Hórreo, ademais, asegurou que o Goberno galego está atento ás novas oportunidades no sector aeroespacial e de defensa, para o que conta cunha estratexia que busca mobilizar 900 millóns e dixo que este mesmo ano licitará os primeiros acordos de asociación, para atraer a Galicia investimentos nestes ámbitos.

Tamén se referiu ás "oportunidades do sector mineiro" e anunciou que a Xunta lanzará este ano un novo concurso de dereitos mineiros similar ao do pasado ano, que permitiu 20 novas prospeccións.

Unidades especializadas para controlar as baixas musculares ou de psiquiatría menor

O presidente da Xunta anunciou que nas próximas semanas a Administración autonómica presentará un programa que incluirá a creación de unidades especializadas para a atención e control das baixas por doenzas musculoesqueléticas ou de psiquiatría menor, "que son as frecuentes".

No seu discurso no debate sobre o estado da autonomía, o máximo mandatario galego explicou que estas unidades servirán de apoio os médicos de atención primaria que xestionan as baixas.

Así mesmo, avanzou que se reforzará o papel das mutuas na revisión das incapacidades temporais. Deste xeito, cando unha mutua realice unha proposta de alta suficientemente xustificada, a inspección sanitaria ratificaraa e acordará a alta.

Rueda sinalou que, se existen dúbidas, a inspección citará o traballador e, en lugar de que as mutuas teñan que solicitar, unha por unha, cada proba ou tratamento ao paciente, tramitarase unha autorización global para facer o seu labor máis áxil e eficaz.

O presidente dixo que este programa de abordaxe das baixadas laborais dialogarase con sindicatos e a patronal para a súa mellora, co obxectivo de que se poña en marcha o máis axiña posible.

"O noso deber é que estea de baixa quen realmente deba estalo e que poida volver traballar en canto estea en condicións", afirmou.

Segundo lembrou, o plan de revisión de baixas que a Xunta xa puxo en marcha permitiu controlar preto de 130.000 baixas, co resultado de que 30.200 persoas non debían estar nesta situación.

Rueda esixe o Goberno que autorice crear unha base da UME en Galicia: "Ningún avance do Pacto de Estado"

Rueda esixiu ao Gobierno central que autorice a creación dunha base da Unidade Militar de Emerxencias (UME) en territorio galego e lamentou que "non houbo ningún avance" do Pacto de Estado anunciado polo presidente Pedro Sánchez o pasado ano durante a vaga de incendios.

No debate no Parlamento Galego, titular do Goberno autonómico reivindicou que a Xunta presentou antes de Semana Santa o Pladiga, que, tal e como lembrou, "contempla actuar sobre un 70 % máis de superficie que o ano pasado a nivel preventivo e incorporar 170 novos efectivos".

Respecto aos incendios, Rueda tamén puxo en valor que a administración autonómica xa ten "en marcha" os compromisos adquiridos na súa comparecencia do mes de setembro tras os lumes do pasado verán.

Entre elas, mencionou a habilitación, "da man dos concellos", dun reforzo da xestión das franxas secundarias, así como o pago de "todas as axudas para a reconstrución de vivendas" e outras infraestruturas.

Sector primario 

En canto ao sector primario, o presidente da Xunta sinalou que no que queda de lexislatura impulsarán a renovación da flota e reclamarán "un novo marco financeiro comunitario" que permita substituír os barcos antigos.

Tamén criticou a "intención" do Goberno central de cambiar "pola porta de atrás" o Regulamento xeral de Costas, o que, na súa opinión, "crea inseguridade xurídica" e "pon en risco" miles de empregos.

Nesta mesma liña, reiterou a demanda ao Executivo central para que rebaixe do 10 % ao 5 % o IVE dos produtos do mar". "É unha das mellores políticas de saúde pública e promoción económica que poden facer", destacou.

En canto á gandería e a agricultura, Rueda celebrou a "modernización" do sector nos últimos anos. Con todo, "ante o risco de baixada dos prezos do leite en orixe", o responsable autonómico defendeu que, "cando sexa necesario", poñerán a situación en mans da Comisión Galega de Competencia e abrirán expedientes con cada incumprimento detectado.

Ademais, expuxo que ata o final da lexislatura a Xunta prevé pechar outras 25 parcelarias que sumarán 23.000 hectáreas máis para "optimizar o esquema de minifundios".

Límites ao uso individual de dispositivos dixitais ata 5º de primaria, regular a IA na educación e sancións a condutas de acoso a docentes

A Xunta limitará o uso individual de dispositivos dixitais para todas as nenas e nenos ata 5º de Primaria a través da futura Lei de educación dixital.

Así o avanzou Rueda, quen subliñou que esta norma "converterá a Galicia na primeira comunidade que regula os usos permitidos e prohibidos da intelixencia artificial dentro da Educación".

Nesta liña, reivindicou "tolerancia cero" contra o acoso escolar e a violencia nas aulas, polo que sinalou que se comezarán a aplicar sancións contra todas aquelas condutas "que atenten contra a dignidade e a autoridade dos docentes".

Reforma da Atención Primaria para liberar médicos de burocracia e limitar axendas

O presidente da Xunta anunciou que, neste mesmo semestre, o Goberno galego iniciará unha "reforma integral" da atención primaria para adaptala á "Galicia actual" e que terá como "obxectivos claros" a liberar os médicos das tarefas burocráticas e alcanzar axendas que non superen os 30 pacientes por xornada ordinaria.

Para lograr estas metas, segundo explicou o máximo mandatario autonómico no debate de política xeneral do Parlamento de Galicia, a Xunta creará unha unidade especial que centralizará as papeladas burocráticas sen valor médico e que "sobrecargan" aos profesionais.

Así mesmo, "aproveitando o impulso desta descarga burocrática", implantará un novo modelo de xestión das axendas "dinámico, flexible e adaptado ás circunstancias de cada centro de saúde" para que o médico lle poida dedicar máis tempo a cada paciente e que teñan "atención de máxima calidade".

"Para coordinar todo isto e para que sexa efectivo", Rueda avanzou que a Xunta poñerá en marcha unha Dirección Xeral de Atención Primaria que, a día de hoxe, aínda non existe no Servizo Galego de Saúde (Sergas). Este órgano velará para que se cumpran todas estas liñas mestras e que se faga un "seguimento constante" das reformas para implantar", sinalou.

Ampliación do Bono Coidado para chegar a 50.000 usuarios

En materia de dependencia, Alfonso Rueda ratificou o anuncio avanzado este mesmo martes de ampliar o Bono Coidado, que se poñerá ao dispor doutras 10.000 persoas maiores e das súas familias, que se suman ás 40.000 que o perciben nestes momentos.

Así, o obxectivo é que esta axuda, que ofrece 5.000 euros ao ano para as persoas dependentes que reciben atención na súa casa, chegue a 10.000 persoas máis no que queda de lexislatura, despois de que se duplicase desde as 20.000 ata as 40.000 ao incrementarse as contías.

Doutra banda, Rueda reivindicou que este mesmo ano Galicia alcanzará "a cifra dos 100.000 dependentes atendidos", e reprochou ao Goberno central que "achega o mesmo que achega a Xunta ao sistema de dependencia".

Rueda afea a "lista de obras pendentes" do Gobierno en Galicia e avisa o Goberno de que a paciencia dos galegos coa AP-9 "está en mínimos"

O presidente da Xunta lamentou que a "lista de obras pendentes" do Goberno central en Galicia lonxe de reducirse "parece enquistarse" e avisou tamén de que a paciencia dos galegos coa situación "insostible" da AP-9 "está en mínimos".

No seu discurso, asegurou que a Xunta está "moi preocupada" polas infraestruturas que o Executivo de Sánchez segue tendo pendentes en Galicia.

"Non só son estradas", dixo para sinalar que os galegos están "moi preocupados pola deterioración progresiva na calidade do tren". "Non podemos resignarnos a dar por normais atrasos cada vez máis longos, cada vez máis frecuentes nun servizo que antes funcionaba razoablemente", afirmou.

Rueda lembrou que el mesmo trasladou estes asuntos na súa reunión co presidente do Goberno, Pedro Sánchez, e citou como pendentes avances na autovía Santiago-Lugo, a mellora das vías do tren cara a Ferrol, a saída sur de Vigo cara a Portugal, completar a dobre vía de conexión con Madrid, claridade respecto á variante de Cerdedo ou a implantación dun servizo de proximidade do que "hai moita propaganda e pouca concreción".

Segundo dixo, moitas destas actuacións deberían estar recollidas nun Plan do Corredor Atlántico do que a Xunta aínda non coñece nin cifras, nin prazos nin obras concretas.

Para rematar, sobre a AP-9, dixo que a situación é "insostible", cos beneficios da concesionaria en "máximos" e a paciencia dos galegos "en mínimos".

Sobre este asunto, reprochou que o Executivo de Sánchez siga ocultando á Xunta o expediente da Comisión Europea. "A nosa postura é clara: transparencia, liberación da concesión e transferencia. Nesa orde", afirmou.

O Pacto pola Lingua, este semestre

Alfonso Rueda avanzou que tras meses de traballo no marco do a actualización do Plan xeral de normalización da lingua galega, este mesmo semestre presentarase aos grupos parlamentarios o Pacto pola Lingua.

Na súa intervención no debate de política xeral no Parlamento, Rueda lembrou que o seu Executivo sempre buscou consenso social e político para impulsar o uso do galego porque entenden que o idioma “non debe utilizarse para dividir”.

“O galego é e debe ser sempre o idioma dun pobo ambicioso e integrador. Un pobo orgullosamente bilingüe”, proclamou o xefe do Executivo autonómico.

Neste sentido, sinalou que o futuro do idioma pasa por incrementar a súa presenza no ámbito tecnolóxico, empresarial e entre os mozos e, sobre eses obxectivos, pivotará o novo plan.

Turismo e Xacobeo 2027

Durante a súa intervención, o presidente da Xunta tamén fixo referencia ao turismo na Comunidade co foco posto no Ano Xacobeo de 2027 que é “unha ocasión única para que todo o mundo mire a Galicia”.

Remarcou que o seu Executivo xa traballa na preparación desta celebración pero, lamentou, que ata a data foi un traballo en solitario xa que o Goberno estatal se desentendeu.

Reprochou esta actuación e volveu a chamar a atención ao Gobierno estatal para que cumpra os seus compromisos porque non é de recibo, dixo, que a falta de nove meses para o Ano Xacobeo aínda non haxa concreción sobre as deducións fiscais para as empresas que colaboren con esta celebración.

Lembrou que a Xunta busca que o Xacobeo capte “o dobre de fondos privados” que os que conseguiu no último ano santo de 2021-2022.

Alfonso Rueda reivindicou o turismo como un motor económico para Galicia e, por iso, alertou contra “as mensaxes perigosas” que algúns gobernos locais lanzan contra os visitantes e que, nalgúns casos, xa están a ter efectos negativos nos datos turísticos, dixo en alusión velada a Santiago de Compostela.

Fronte a estas mensaxes, o xefe do Executivo galego, subliñou que na Comunidade galega é benvido todo aquel “que veña coñecernos con respecto”. 

A Xunta terá unha nova delegación en Bos Aires

O xefe do Executivo galego confirmou que a Xunta contará cunha nova delegación en Buenos Aires para ratificar o “peso especifico” que ese país ten para Galicia debido á diáspora.

“Non en balde, Arxentina foi bautizada como a quinta provincia galega e nela residen case 200.000 galegos de pleno dereito”, argumentou Rueda na súa intervención no debate de política xeral de metade de lexislatura.

Todos eses galegos atoparán “as portas abertas” desa nova delegación do Gobierno galego que contará, segundo avanzou, cunha sede “moderna, ampliada e adaptada aos novos tempos”.

Incidiu en que será “un “espazo digno de Arxentina e propio de Galicia” e que servirá para potenciar os obxectivos estratéxicos dirixidos aos galegos no exterior.

Con todo, o presidente galego celebrou que a Galicia chegan cada día máis persoas xa que desde 2009 Galicia acumula 170.000 persoas que se asentaron na Comunidade fronte ás que abandonaron o territorio.

Segundo Rueda, “Galicia converteuse, cada vez máis, en terra receptora de moitos acentos distintos” e engadiu que, “excepto en contadísimas excepcións, non supuxeron ningún problema para a convivencia”.

“Somos unha terra acolledora que facilita a integración, igual que fixeron connosco cando tivemos que emigrar”, resumiu o presidente da Xunta.

O xefe do Executivo galego tamén presumiu duns datos demográficos que, ao seu xuízo, "invitan ao optimismo" debido ao incremento dos nacementos, que aumentaron un 1,6 % entre 2024 e 2025. 

Rueda defende un "autonomismo útil" e pide "lealdade" ao Goberno: "Galicia non pode seguir perdendo" 

O presidente da Xunta, Alfonso Rueda, defendeu o "autonomismo útil" que cre que practica o Goberno galego nas súas reclamacións ao Goberno estatal, ao que esixiu "lealdade e colaboración".

Deste xeito advertiu que Renfe non pode ver na comunidade galega "un lugar ao que vir facer caixa" e criticou que os responsables do Ministerio de Transportes, tanto o actual como o anterior, "non están no importante".

Así que instou ao Executivo central a recuperar "a unidade" e a "coordinación" e criticou a "falta de lealdade institucional", tanto nesta materia como noutras, nas que está a reclamar máis competencias. "Galicia non pode seguir perdendo", aseverou.

En todo caso, puntualizou que Galicia non pretende conseguir "competencias ao peso", como cre que se queren outros partidos, e destacou que dentro da aposta polo "autonomismo útil" xa avanzan "a bo ritmo" as negociacións para a transferencia das autorizacións para os permisos de traballo, que espera que se traspase "antes de que termine este ano".

No ámbito da cooperación institucional, pero neste caso coas administracións locais, tamén anunciou que a Xunta vai lanzar "unha liña de axudas para os municipios de menos de 20.000 habitantes" para apoialos no cofinanciamento dos proxectos con fondos da UE.

Segundo explicou, será en forma de préstamos aos concellos para que poidan acceder con máis facilidade aos programas europeos de desenvolvemento local, que precisan financiamento que os concellos "non poden asumir".

E cunha nova referencia ao lema recuperado e reiterado nesta lexislatura puxo o broche a un discurso que durou 90 minutos, ao dicir que a Xunta seguirá traballando "para pechar unha década que mereza ser resumida en dúas palabras: Galicia Calidade".