Países do golfo Pérsico denuncian lanzamento de mísiles por parte de Irán en plena tregua
Todos os proxectís foron interceptados con éxito e só provocaron danos materiais en varias vivendas da rexión de Sitra, en Barhein
Desde o inicio da guerra, o pasado 28 de febreiro, varios países foron branco de centos de ataques con drons e mísiles balísticos iranianos
Varios países do golfo Pérsico como Catar, Arabia Saudita, Emiratos Árabes Unidos (EAU), Kuwait e Barhein denunciaron este mércores que Irán lanzou mísiles e drons contra o seu territorio malia que entrou en vigor o cesamento do fogo alcanzado onte á noite entre Teherán e Washington.
EAU interceptou 17 mísiles balísticos e 35 drons
O Ministerio de Defensa de Emiratos Árabes Unidos informou nun comunicado que "os flagrantes ataques iranianos desde o inicio da vixencia do cesamento do fogo alcanzaron os 17 mísiles balísticos e 35 drons", mentres que afirmou que as defensas aéreas do país "tiveron éxito en interceptalos".
Pola súa banda, o Ministerio de Interior de Barhein dixo que un ataque iraniano provocou danos en varias vivendas da rexión de Sitra, no nordés do país e preto de Manama, despois de que os fragmentos resultantes da intercepción caesen na zona.
Segundo o Ministerio de Defensa de Arabia Saudita, as defensas aéreas do reino interceptaron e destruíron "nove drons durante as últimas horas", sen precisar máis detalles sobre cando se efectuou o ataque nin as circunstancias do mesmo.
Catar e Kuwait, tamén obxectivo dos iranianos
Así mesmo, Catar anunciou que este mércores foi branco dun ataque con sete mísiles balísticos e un número indeterminado de drons lanzados desde Irán, segundo o Ministerio de Defensa catarí, que afirmou que as Forzas Armadas "lograron interceptar e neutralizar con éxito" todos os proxectís.
Tamén o Ministerio de Defensa de Kuwait afirmou que as forzas do país responderon o lanzamento de catro mísiles balísticos e 42 drons nas últimas 24 horas, nas que un dos obxectivos eran as instalacións pertencentes á Corporación Petroleira Kuwaití, alén de plantas eléctricas e desalinizadoras.
Desde o inicio da guerra dos Estados Unidos e Israel en Irán, o 28 de febreiro, varios países árabes do golfo Pérsico, así como Xordania e a rexión semiautónoma do Kurdistán iraquí (norte), todos aliados rexionais de Washington, foron branco de centos de ataques con drons e mísiles balísticos iranianos e dos seus grupos aliados en Iraq.
.png)
