Ana Peleteiro voa cara ao ouro no Europeo de Roma

Ana Peleteiro demostrou estar nun gran momento de forma. Nos Europeos de Roma acadou a medalla de ouro cun salto de 14.85, a mellor marca da temporada e segunda da súa carreira, só por detrás dos 14.87 que acadou nos Xogos Olímpicos de Toquio. 

A de Ribeira colocouse en cabeza no primeiro salto con 14.37 e mellorou ata os 14.46 no segundo. Xusto antes de saltar no terceiro apareceu a turca Danismaz para sorprender cun salto de 14.57 e relegala ata a segunda posición. 

Foi un espellismo. A mellor Ana Peleteiro volveu aparecer nas dificultades -como acontece habitualmente- e executou un cuarto salto que garantía o ouro europeo e marca terreo de cara aos Xogos Olímpicos de París, a cita na que quere sacar o mellor do seu repertorio para acadar a cima. 

Adrián Ben, sexto nos 800 metros

O viveirense Adrián Ben acabou no sexto posto nuns 800 metros de moito nivel. Ben tivo un incidente na primeira volta, pasou ás últimas prazas e na segunda non conseguiu facer a remonta. Por diante o francés Tual acadou a vitoria, co español Attaoui na segunda posición chegando desde atrás e o italiano Tecuceanu acabou como medalla de bronce. De Arriba, o terceiro español, tamén estivo a bo nivel cun cuarto posto.