Ana Peleteiro, baixa para o Europeo de nacións por "causas persoais de forza maior"

A galega Ana Peleteiro, vixente campioa de Europa de triplo salto, anunciou este domingo que non estará no Europeo de nacións de Madrid (26-29 xuño) por "causas persoais de forza maior", e será substituída por María González Sanchís.

"Sinto moito dicirvos que, por causas persoais de forza maior, non poderei participar no Campionato de Europa por países a próxima fin de semana. Quería agradecer o apoio e a comprensión por parte da Federación de Atletismo, de todos os meus compañeiros do equipo e de todos os patrocinadores. Grazas a todos", dixo Peleteiro, nas súas redes sociais.

A triplista galega, dobre campioa de Europa de pista cuberta e medallista de bronce nos Xogos Olímpicos de Tokyo 2020, ía participar no concurso de triplo salto no Estadio de Vallehermoso como unha das principais bazas do equipo español en busca do podio continental. A súa substituta na proba de triplo salto é a valenciana María González Sanchís, medallista de bronce este ano no Campionato de España de pista cuberta.