Publicador de contidos

Alxeria acusa a Marrocos de matar tres civís no Sáhara e anuncia represalias

Alxeria acusa a Marrocos de matar tres civís no Sáhara e anuncia represalias

Marrocos non quixo nin confirmar nin desmentir o bombardeo na antiga colonia española

Fronteira entre Marrocos e Alxeria Fronteira entre Marrocos e Alxeria
G24.gal 03/11/2021 22:00

A tensión bélica disparouse hoxe no norte de África despois de que Alxeria denunciase que un presunto avión de combate marroquí non tripulado matou tres civís alxerianos que se desprazaban en dous camións no deserto do Sahara Occidental.

Nun comunicado difundido a media tarde, o palacio presidencial subliñou que os camioneiros foron "covardemente asasinados" nun "bárbaro bombardeo" e advertiu de que este acto hostil "non quedará sen castigo". "

Preguntado por Efe, o goberno marroquí non quixo nin confirmar nin desmentir o incidente, que segundo testemuñas consultadas por Efe non é o primeiro e que eleva a cotas non coñecidas en décadas a temperatura bélica na fronteira sur de Europa. 

Conflito do Sáhara Occidental

A tensión é especialmente alta na antiga colonia española desde que hai un ano o Exercito marroquí penetrase na área desmilitarizada de Guerguerat para desmantelar unha sentada de civís saharauís que protestaban contra o uso comercial que fan deste paso fronteirizo Marrocos e Mauritania, a pesar de que se trata dunha zona en disputa suxeita (como o resto do Sahara Occidental) ao proceso de descolonización da ONU.

Un días despois, a Fronte Polisario anunciou que consideraba roto o cesamento do fogo asinado en 1991 coa mediación da ONU e o inicio de accións de fustrigación ao longo do muro construído por Marrocos, considerado o máis longo do mundo. Desde entón, o ministerio de Defensa da República Árabe Saharauí Democrática ( RASD) emitiu centenares de "partes de guerra" e informado de varias vítimas nos dous bandos enfrontados, entre o silencio de Rabat, que nega que exista unha guerra.

A semana pasada, o Consello de Seguridade da ONU acordou ampliar o mandato da Misión de Nacións Unidas para o Sahara Occidental ( MINURSO), nunha resolución que rexeitaron tanto Alxeria como a Fronte Polisario ao considerar que socavaba o proceso para o referendo de autodeterminación e reforzaba as teses de Marrocos, que xa anunciou que non está disposto a negociar a posible independencia.

O Polisario advertiu, ademais, que nestas condicións o novo documento de Nacións Unidas non lle deixaba outra alternativa que "seguir coa loita armada".

Conflito Alxeria-Marrocos

Co conflito cada vez máis deteriorado, Alxeria avanzou un paso máis en agosto na súa estratexia para illar a Rabat no norte de África e recuperar a influencia perdida no Sahel durante os seis anos que durou a enfermidade do entón presidente Abdelaziz Buteflika e a loita polo poder entre as distintas ramas do Exército, que domina o país desde a independencia de Francia.

Alxer anunciou a ruptura de relacións diplomáticas con Rabat, ao que acusou de azuzar o terrorismo en Alxeria a través da conexión dos seus servizos secretos co movemento independentista cabil e de desestabilizar a rexión e o mundo árabe ao normalizar as relacións con Israel.

A consecuencia máis directa foi o peche do Gasoduto Magreb Europa ( GME), que desde hai 25 anos abastecía a España e Portugal a través de territorio marroquí. Unha decisión xeoestratéxica meditada e de longo percorrido da que, segundo dixo o luns o enviado especial da presidencia alxerina para o Sahara Occidental e o Sahel, Amar Belani, non vai dar marcha atrás, como ocorreu coa decisión sobre a fronteira común, pechada desde 1994. 

Publicidade
Publicidade
Publicidade
Pódeche interesar

Publicador de contidos