Altri asegura que a fibra que se producirá en Palas é de uso téxtil, nunca para papel
Altri asegura que en Palas de Rei fabricaranse 250.000 toneladas de fibra téxtil
“No caso da fibra soluble destinada á produción de fibras téxtiles, o proceso de branqueo non se realiza con compostos de cloruro, senón con osíxeno e derivados deste, ademais de producir menos emisións”, asegura
“Trátase dun proxecto de altísima tecnoloxía que situará a Galicia á bandeira da industria de téxtil sostible en Europa”, explica a empresa
Greenfiber, a sociedade participada pola multinacional lusa Altri que promove a implantación dunha fábrica de fibras téxtiles a base de celulosa no municipio lucense de Palas de Rei, asegura que a produción desa planta iría “dirixida exclusivamente ao sector téxtil, nunca á produción de papel”.
Nun comunicado, o director de Innovación de Altri, Gabriel Sousa, explica que “os procesos e calidade dos produtos son completamente distintos”.
Por unha banda, afirma, “no caso da fibra soluble traballamos practicamente con celulosa pura, polo que se descartan para o proceso todos os demais compoñentes da madeira, como a lignina ou a hemicelulosa que, neste último caso, si se emprega na produción de papel”.
Ademais, aclara que “no caso da fibra soluble destinada á produción de fibras téxtiles, o proceso de branqueo non se realiza con compostos de cloruro, senón con osíxeno e derivados deste, ademais de producir menos emisións”.
Nese sentido, o director de I+D de Altri asegura que “a conversión de fibra soluble de madeira en lyocell e noutras fibras téxtiles é un proceso de química avanzada, de alta tecnoloxía, moi afastado do da produción de papel”.
“Trátase dun proxecto de altísima tecnoloxía que situará Galicia á bandeira da industria de téxtil sostible en Europa”, explica a empresa promotora.
“O sector da moda necesita fibras téxtiles biodegradables e, en Europa, o proxecto GAMA vén dar resposta a esa necesidade, coa produción de lyocell e de fibras solubles de madeira destinadas exclusivamente ao sector téxtil. A isto hai que engadir a reciclaxe téxtil, que se incorporará ao proceso nunha segunda fase”, precisou Gabriel Sousa.
"Actualmente existen proxectos de investigación, que estamos a seguir de preto, pero ningún deles ten escala industrial, por iso, contar cunha planta industrial de fibras téxtiles, como o lyocell, daranos a forza necesaria para o desenvolvemento de proxectos de reciclaxe, que se irían incorporando paulatinamente ao proceso de produción”, insistiu.
Dous produtos de base celulósica
Sousa explica que na planta de Palas de Rei se fabricarán dous produtos, ambos de base celulósica: en primeiro lugar, 250.000 tm de fibra soluble para a cadea téxtil, das cales 60.000 tm utilizaranse para fabricar na mesma planta o segundo produto, lyocell, mentres que as 190.000 tm restantes terán como destinatarios outros operadores do sector téxtil.
“A diferenza entre ambos os produtos é que o primeiro é a base do segundo, pero ademais pode ser a materia prima para outros produtos do sector téxtil. Así pois, en ambos os casos -fibra soluble e lyocell-, a base é a mesma: a madeira e, por tanto, tamén as súas calidades: 100% biodegradable e 100% reciclable”, recalca Sousa.
